Bi boneya 8’ê Adarê Roja Jinan a Cîhanê, Federasyona Rêxistin û Dezgehên Mafên Mirovan a Sûriyeyeyê û hejmareke rêxistin û dezgehên mafên mirovan û civaka sivîl a Sûriyeyê peyameke hevbeş da. Rêxistinan di peyamê de hevgirtina xwe ya bi jinên li Sûriyeyê re nîşan da û bang li wan hat kirin ku vê boneyê veguherînin “çirayeke daîmî ji bo spandina nirxên aştiyê û avakirina siberojeke demokratîk ku rêzê li mafên mirovan digire”.
Di peymanê de têkoşîna tevgerên jinan ên li Sûriyeyê û cîhanê hat silavkirin û hate gotin: “Em hevgirtina xwe bi jinên sûriyeyî re di têkoşîna wan a ji bo bidestxistina tevahî mafên wan, jiholêrakirina hemû cûreyên cudakarî û tundiyê de.”
Di dewama peyamê de hate gotin, di pêvajoya şer û aloziya Sûriyeyê de herî zêde jinan zirar dît û hate bibîrxistin ku li hemberî jinan binpêkirinên mezin wekî kuştin, tevandin, windakirina bi darê zorê, girtin, êşkencekirin û koçberkirina bi darê zorê, tundiya fîzîkî û dirûnî hatin kirin. Her wiha hate gotin, jinên sûriyeyî di salên aloziyê de barên herî mezin rakirin û li hemberî xizantî, koçberî û bêaramiyê sekinin.
Di peyamê de banga xurtkirina tevkariyê, xebata hevbeş ji bo pêşxistina xebata hiqûqî û demokrasî li rêxistinên jinan û rêxistinên mafên mirovan ên Sûriyeyê hat kirin ku pêvajoya veguhêz ber bi dewleta qanûn û saziyan ve bibe.
Di peyamê de her wiha sersaxî ji malbatên qurbaniyan re hat xwestin.
Di dewama peyamê de ji bo pêşxistina aştî û çareseriya siyasî banga avêtina van gavan li tevahî aliyên sûriyeyê hatin kirin, “Komîteyekê ji tevahî pêkhateyên siyasî û civakî yên Sûriyeyê ava bikin da ku destûrke nû ji welat re binîvisîne, hilbijartinên parlamento û yên serokatiyê di çarçoveyeke siyasî ya demokratîk de li dar bixin. Şer li tevahî xaka Sûriyeyê rawestînin û çareseriyeke siyasî ya giştî bidin destpêkirin. Çek tenê di destê dewletê de bimîne, ji bo dabînkirina pêdiviyên mexdûr û koçber û penaberan hewldanên mirovî pêk bînin. Çanda hemwelatîbûnê, efû û aştiya civakî di nava Sûriyeyan de belav bikin, çarenûsa revandî û kesên winda aşkera bikin û edaletê ji qurbaniyan re garantî bikin, ji bo pêkanîna edaleta veguhêz û hesabpirsîna ji kesên ku binpêkirinên mezin kirine, bixebitin.”
Di peyamê de hate gotin, divê beşdariya jinan di jiyana siyasî, avakirina biryaran, hewldanên jinûve avakirin û gişkirinê de were mîsogerkirin û têkoşîn li dijî tevahî cûreyên cudekariyê were kirin.
Hate gotin: “Divê qanûnên Sûriyeyê li gorî peymanên navneteweyî yên têkildarî mafên jinan werin nûkirin. Divê rêgeza ku cûdekariya li hemberî jinan were rakirin, di destûra Sûriyeyê de hebe. Divê qanûnên tundî li dijî tundiya malbatî û civakî werin derxistin, beşdarbûna jinan di jiyana giştî û siyasî de were xurtkirin, piştgiriya jinan di warê perwerde û fêrkirinê were kirin û kar ji jinan re were peydakirin, li dijî xizanî û nezaniyê kar were kirin.”
Di dawiya peyamê de hat gotin, “Pêdiviya avakirina siberoja Sûriyeyê bi sepandina nirxên demokrasiyê, mafên mirovan û wekheviya di navbera hemû welatiyan, jin û mêran de heye. Her wiha ji bo pêkanîna aştî, edalet û rûmeta mirovan xebateke hevbeş hewce dike.”
