Li bajarê Liverpool ê Îngilîstanê bi wesîleya 8’ê Adarê Roja Jinên Kedkar ên Cîhanê bi hezaran jin daketin qadan. Bi dehan rêxistinên jinan ku jinên Kurd jî di nav de bûn, li dijî tundiya mêr, şer û tundiya polîs-dewletê meşiyan.
Di çarçoveya çalakiya 8’ê Adarê de ku wekî her sal îsal jî bi pêşengiya rêxistinên femînîst ên Îngilîz hat lidarxistin, bi sedan jin li pêşiya The Bombed Out Churchê li hev civiyan. Jinan tevî hilgirtina pankart û berzkirina dirûşmeyan, îşaret bi tundî, newekhevî û cihêkariya li dijî jinan kirin.
Rêxistinên jinan bi rengên xwe tevlî bûn û bi awayê kortejê dest bi meşê kirin.
Li ser navê Rêxistina Jinên Kurd a Liverpoolê Viyan Hesekê diyar kir ku tundî û şerên li dijî jinan zêde dibe û bi taybet îşaret bi êrîşên li ser şoreşa jinan a li Rojava kir.
Hesekê diyar kir ku jinan jiyaneke li ser bingeha wekhevî, azadî û edaletê dixwazin û anî ser ziman ku li gelek cîhên cîhanê êrîşên sîstematîk ên li dijî mafên jinan zêde bûne û têkoşîna jinan jî mezin dibe.
Piştî axaftinan, dirûşmeyên, “Jin, Jiyan, Azadî” û “Women, Life, Freedom” hatin berzkirin. Jinan banga mezinkirina têkoşîna azad û wekhev kirin.
