Li bajarên cuda yên Elmanyayê ji ber 8’ê Adarê Roja Jinên Kedkar ên Cîhanê mîtîng, meş û çalakiyên çandî hatin lidarxistin.
HAMBURG
Li bajarê Hamburgê yê Elmanyayê, di 8’ê Adarê Roja Jinên Kedkar ên Cîhanê de bi hezaran kes bi şîara “Em têkoşînên femînîst ên enternasyonal bikin yek” daketin qadan. Çalakiya ku ji aliyê platforma 8’ê Adarê ya Hamburgê ve hate birêxistinkirin, li Landungsbrückenê bi performansa dansê û mîtîngê dest pê kir.
Di mîtîngê de nûnera Meclîsa Jinan a Rojbîn Leyla Kaya axivî û got: “Sala borî, her roj bi bîra me xist ku divê em li dijî her cure tundiya baviksalarî û kedxwariya kapîtalîst, têkoşîna xwe ya ji bo azadiya rastîn û azadiya xwe hîn bêtir xurt bikin. Kuştina jinan kêm nebû, şer jî wisa. Berevajî vê, Şoreşa Jinê ya Rojavayê ku ji bo têkoşînên azadiya jinê yên li seranserê cîhanê bû çavkaniya îlhamê, bi piştgiriya Rojava ji aliyê cîhadiyan ve rastî êrîşê hat. Di serê salê de dewama serhildana Jin Jiyan Azadî bi awayekî hovane hate tepisandin, bi hezaran û heta bi deh hezaran protestoker hatin qetilkirin. Encama şerê êrîşkar ê ku DYA û Îsrail li dijî Îranê dimeşînin ne diyar e. Baviksalarî li dijî me di êrîşê de ye da ku rê li ber vê bigre ku sedsala 21’an bibe sedsala şoreşên jinan û azadiya jinê. Lê belê gotin û daxwaza me tam ev e. Di Roja Jinan a Cîhanê ya îsal de em dibêjin: Dema şoreşên jinan hat. Em ê di têkoşînê de bi hev ve girêdayî, di berxwedanê de weke yekbûyî jiyaneke azad biafirînin. Jin Jiyan Azadî!”
FRANKFURT
Li bajarê Frankfurtê yê Elmanyayê, bi banga Yekîtiya Jinên Kurd a Elmanyayê (YJK-E)-Hessen, Young Struggle, Yeni Kadın, ADKH, Latinas Unidas, Zora, RoR, Aufbau Frankfurt, Kommunistische Frauen, FKO û Feministische Vernetzungê bi sedan jin saet di 13.00’an de li Kaiserstrasse hatin cem hev.
Bi minasebeta 8’ê Adarê Roja Jinên Kedkar ên Cîhanê piştî mîtîngê meşek hate lidarxistin. Di çalakiya ku rengên jinên Kurd û çanda Kurdî mohra xwe lê xist de hate destnîşankirin ku tevgera jinên Kurd li Kurdistan û cîhanê pêşeng û hêza rêxistinkirî ya têkoşîna jinê ye.
HEILBRONN
8’ê Adarê Roja Jinên Kedkar ên Cîhanê li bajarê Heilbronn ê Elmanyayê bi meşekê hate pîrozkirin.
TJK-E ya Heilbronnê jî beşdarî meşa ku ji aliyê gelek rêxistinên jinan ve hatibû organîzekirin bû. Jinên ku li Kiliansplatzê kom bûn, ber bi navenda bajar ve dest bi meşê kirin. Di meşa ku jinên Kurd jî bi sembolên xwe beşdar bûn de, her tim dirûşmên “Jin Jiyan Azadî” û “Frau Leben Freiheit” hatin berzkirin.
Jinên ku dîsa vegeriyan Kiliansplatzê, li vir mîtîngek li dar xistin. Di axaftinên ku li ser navê saziyên jinan hatin kirin de, tundiya pergala kapîtalîst a li ser jinan û pergala keda ya cudakar hate şermezarkirin.
BERLÎN
Li bajarê Berlîn ê Elmanyayê bi sedema 8’ê Adarê Roja Jinên Kedkar ên Cîhanê meşek û bernameyeke çandî hate lidarxistin.
Bi banga hevpar a saziyên jinan ên mîna Meclîsa Jinan a Dest Dan e.V., Jinên Ciwan ên Berlînê, Ofîsa Aştiyê ya Jinên Kurd Cênî e.V., Ararat Berlin, Pudu HEPA, Meclîsa Jinên Êzîdî ya Berlînê, Gemeinsam Kämpfen Berlin, Komuna Jinên Ciwan a Enternasyonal a Berlînê û Korea Verbandê bi sedan jin beşdar bûn.
Jinên ku saet di 13.00’an de li Alexanderplatzê hatin cem hev, bi dirûşma Elmanî “Im Widerstand vereint schaffen wir das freie Leben” dest bi meşê kirin.
DUISBURG
Li bajarê Duisburg ê Elmanyayê bi minasebeta 8’ê Adarê Roja Jinên Kedkar ên Cîhanê, ji aliyê Meclîsa Jinan a Şehîd Asya Yuksel a Duisburgê û Feministische Aktion Duisburg ve meşek hate lidarxistin.
Jinên ku saet di 16.00’an de li Duisburg-Dellplatzê hatin cem hev, li vir mîtîngek li dar xistin. Piştî ku di mîtîngê de deqeyek rêz hate girtin, beyannameya 8’ê Adarê hate xwendin. Piştî axaftinan jinan bi dirûşman dest bi meşê kirin û di dema meşê de belavokên xwe xwendin.
Di beyannameya ku di dema meşê de hate xwendin de, bal hate kişandin ser rola pêşeng a jinan di Şoreşa Rojava de û hate destnîşankirin ku têkoşîna hêzên YPJ’ê ya li dijî DAIŞ’ê mirovahî ji komkujiyeke mezin parastiye. Her wiha di daxuyaniyê de hate diyarkirin ku statuya ku li Rojava hatiye bidestxistin, di heman demê de statuya wekhevî û azadiya jinan temsîl dike.
