Newroza îsal dê bi dirûşmên “Newroza azadî û yekitiya demokratîk” û “Newroza azadî û demokrasiyê” bê pîrozkirin. Deklarasyona li Amedê li Sumerparkê hate eşkerekirin. Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir, Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, Hevberdevkê Înîsiyatîfa Yekitiya Demokratîk Mehmet Kamaç û nûnerên rêxistinê civaka sivîl û partiyên siyasî tevlî daxuyaniyê bûn.
Hevberdevkê Înîsiyatîfa Yekitiya Demokratîk Mehmet Kamaç piştî deklarasyonê axivî û xwest Newroza îsal bibe Newroza yekitî, serkeftin û azadiyê. Kamaç, got ku dê îsal du cejnan bi hev re pîroz bikin û ev tişt anî ziman: “Hêvîdarin ev cejn bibin cejnên serkeftinê. Dîsa li ser Kurdan êrişên qirkirinê hene. Li ser Rojava biryar dan, xwestin Rêveberiya Xweser tune bikin. Armanc, tunekirina destkeftiyên Kurdan bû. Gelê Kurd li dîaspora û her çar parçeyan bi ruhê yekitiyê rabû ser pêyan û pêşiya qirkirinê girt. Me li Rojava dît ka yekitiya Kurdan çiqasî girîng e. Heke Kurd bibin yek, hemû dinya jî êriş bibe ser nikarin tiştekî bikin. Niha di navbera DYA-Îsraîl û Îranê de şer heye. Li ku derê şer çêbibe, li wir êriş dibin sr Kurdan. Newroza 2026’an dê ji bo Rojhilata Navîn bibe Newroza azadiyê. Ji bo gelê Kurd dê bibe Newroza yekitiyê. Gelê me bila bi ruhê Kawayê Hesinkar, bi ruhê Rojava vê Newrozê veguherîne Newroza azadiyê. Bila bibe wesîleya azadiya gelê Kurd û Rojhilata Navîn. Lewma divê gelê Kurd di Newrozê de qadan tije bike.”
Hevseroka Giştî ya DBP’ê Çîgdem Kiliçgun Uçarê jî diyar kir ku di nava salekê de her tiştek pir bi lez rû daye û wiha axivî: “Meclisê biryara înkar û bişaftinê dabû. Lê niha çi bû? Bi îradeya birêz Ocalan bangek hate kirin. Îro Meclisê pirsgirêka Kurd veguherand peywira xwe. Me bi têkoşîn û berxwedanê bersiv da polîtîkayên înkar û bişaftinê û me anî Meclisê. Lêbelê partiyên siyasî jidil nêz nabin. Gelê me dê dev ji berxwedan û têkoşîna xwe bernede û dê vê rewşê jî biguherîne. Li çar parçeyên Kurdistanê û Ewropayê gelê me ji ber êrişên ser Rojava dakete kolanan. Rojava, sembola yekitiya demokratîk e. Keziyên Denîz Çiyayê birîn û ji me re şandin. Lê belê ev kezî ji bo me bûn sembolên berxwedanê û her kesî keziyên xwe vehand. Têkoşîna me kir yek. Niha jî li Komara Îranê ya mirovan darve dike şer heye. Îsraîl îro êrişî wir dike û komkujiyan dike. Lê em dizanin ku daxwaza gelên Îranê wekhevî û demokrasî ye. Banga Aştî û Civaka Demokratîk, em nêzî azadiya me, azadiya jinê û azadiya birêz Ocalan kir. Statuya zimanê me, statuya Kurdistanê, stauya gelê Kurd daxwazên sereke yên gelê Kurd in.”
Hevserokê Giştî yê DEM Partiyê Tuncer Bakirhan jî şerê li cîhanê bi bîr xist û got: “Em di rojên dîrokî de ne. Divê Kurd bibin yek. Heke Kurd bibin yek, dê ne agirê Newrozê vemire ne jî Kurd bên kuştin. Îro li Rojhilata Navîn hesabên nû hene. Her kes li ser Kurdan diaxive. Bila her kes bizane ku Kurd dê azadî û statuya xwe bi dest bixin. Bila ev Newroz bibe wesîleya yekitiya deokratîk a gelê Kurd. Qada Newrozê dê bibe ruhê yekitiya gelê Kurd. Em îro li Amedê bangî hemû Kurdan dikin; dem dema yekitiya Kurdan e. Em ji bo yekitiya Kurdan amade ne. Em 4 nînin. Em yek in. Agirê Newroza îsal dê bibe çiraya aştiyê.”
Di berdewamê de Bakirhan bi bîr xist ku Reber Apo bi banga 27’ê Sibatê re ev çiraye vêxistiye û wiha dirêjî da axaftina xwe: “Hewceye em vê çirayê geştir bikin. Werin em bi hev re agirê Newrozê geş bikin. Bi yek dengî bibêjin aştî, azadî, aramî. Em di rojên pir dîrokî de ne. Şer, pevçûn û komkujî berdewam in. Kurd jî di nîva van pevçûnan de cih digirin. Duh dema li Iraqê, li Sûriyeyê şer diqewimî Kurd di rojevê de bûn û îro jî Kurd li Îranê di rojevê de ne. Lêbelê nîqaşên li ser Kurdan xelet in. Kurd, hêza çekdar a tu kesekî nînin. Mafên gelê Kurd hatine redkirin û heta niha jî têdikoşin. Dema ev hêzên hegemon nebûn jî Kurd her roj li qadan bûn, têdikoşiyan. Îro jî gelê Kurd ji bo yekitiya neteweyî, ji bo maf û azadiya xwe li her devera cîhanê têdikoşin. Êm biqasî tu caran nebûn niha hişyar û baldar in. Geşedanên li Rojhilata Navîn ji nêz ve dişopînin. Îro li Rojhilata Navîn qedera me tê diyarkirin. Di vê pêvajoyê de em ê ne li ser maseyan bên xapandin ne jî bibin mertalê hêzên hegemon. Bi gelên xwe, bi ciwanên xwe, bi yên li dijî rejîma molayan derdikevin, bi yên dibêjin ‘jin, jiyan, azadî’ re, bi Farisên bindest, bi gelên Îranê re em ê têbikoşin û maf û statuya xwe misoger bikin.”
Wekîlê DEM Partiyê yê Wanê Sînan Çîftyurek jî got: “Duh aqilê me li ser Rojava bû û niha jî li ser Rojhilat e. Îsal ji bo Kurdan pir girîng e. Ji ber ku li vir pêvajoyek heye, li ser sînor jî şer. Gelê Kurd êdî li her çar parçeyan jî bêstatuyê qebûl nake.”
Ji Partiya Azadî Cemal Satî jî Newroza gelê Kurd pîroz kir.
Piştre jî vîdeoyeke ji peyamên Rêber Apo yên berê pêk dihat hate pêşandan. Di dawiya vîdeoyê de dirûşma “Bijî Serok Apo” hate berzkirin.
Daxuyanî, bi gerandina govendê bi dawî bû.
