Ji 38 kesên ku di serdegirtinên malan ên serê sibê ya 24’ê Adarê de piştî pîrozbahiyên Newrozê li Stenbolê hatibûn binçavkirin, 10 kesên ku di nav wan de zarok jî hene hatin girtin. Piştî pîrozbahiyên Newrozê yên ku li Kurdistan û Tirkiyeyê bi beşdariya bi milyonan kesan pêk hatin, di serdegirtinên malan de zêdetirî 170 kes hatibûn binçavkirin. Derket holê ku polîsan li hin malan îşkence li zarokên binçavkirî kiriye û gef li malbatên wan xwariye. Ji 38 kesên ku bi serdegirtina malan hatibûn binçavkirin, 9 kes ji aliyê Dadgeriya Cezayê ya Sulhê ve hatin girtin.
JI BER STRANA’ORAMAR’ HATE GIRTIN
E.Y. yê 17 salî yê ku beşdarî pîrozbahiyên Newrozê yên êvara Adarê li Başakşehîra Stenbolê bûbû, ji ber ku strana “Oramar” gotiye hat girtin. Dadgeriya Cezayê ya Sulhê di biryara girtinê de strana “Oramar” wekî “propagandaya rêxistinê” nîşan da û ji bo gelê ku beşdarî pîrozbahiya Newrozê bûye îfadeya ‘Kesên alîgirê rêxistina terorê ya çekdar’ bikar anî. Di biryara girtinê de ji bo Newrozê bikaranîna îfadeya qaşoyî bal kişand.
JI BO ZAROKÊ 17 SALÎ ANGAŞTA ‘DIKARE DELÎLAN REŞ BIKE’
Bala mirovan kişand ku Dadgeriya Cezayê ya Sulhê biryara girtina E.Y. yê 17 salî li ser ‘gumana reşkirina delîlan, dikare li ser kesên din zextê bike û gumana revînê’ daye. Dadgehê dema ku ji bo Newrozê îfadeya ‘qaşoyî’ bikar anî, bi heman angaştan ji bo 10 kesan biryara girtinê da. Kesên din ên hatibûn binçavkirin bi biryara kontrola edlî hatin berdan.
