Li hemberî îdiaya “xwe kuştinê” ya derbarê mirina Mehmet Çeviren ku li Girtîgeha Girtî ya Ewlehiya Bilind a Beşîriyê ya li Êlihê jiyana xwe ji dest dabû, malbata wî bertek nîşan da. Hat îdiakirin ku Mehmet Çeviren (42) ê bavê 3 zarokan ku di sala 2016’an de li navçeya Dêrika Mêrdînê hatibû binçavkirin û cezayê heta hetayî yê girankirî lê hatibû birîn, li girtîgehê xwe kuştiye.
Birayê Çeviren, Welat Çeviren ji nûçegihanê Ajansa Mezopotamyayê (MA) Ozan Bayindir re axivî, îdiayên navborî red kir û diyar kir ku mirina birayê wî bi guman e.
Çeviren ji ber mirina birayê xwe sersaxî ji gelê Kurd û girtiyên li zindanan re xwest û wiha got: Mirin ji me ne dûr e lê azadî jî ne dûr e. Birayê min şehîd e. 7 sal bûn di şaneya yekkesî de bû. Bêbextiyê dikin, dibêjin ‘xwe kuştiye’. Di şaneya yekkesî de şert û mercên ku xwe bikuje nîn in. Ez beriya 2 rojan li cem wî bûm. Min kinc ji bo wî birin, daxwazên wî bûn. Ger bixwesta xwe bikuje, ev tişt nedixwest. Ev guman in.”
Çeviren destnîşan kir ku dewlet ji jiyana girtiyên di girtîgehan de berpirsiyar e û got: Birayê min tu carî li zindanê jî serê xwe li ber wan neçemand. Em ê bi serbilindî wî bispêrin axê.
WÊ SIBÊ BÊ SPARTIN
Cenazeyê Mehmet Çeviren, piştî karûbarên otopsiyê yên li Nexweşxaneya Perwerde û Lêkolînê ya Êlihê, ber bi navçeya Dêrikê ve hate birêkirin. Hat hînbûn ku termê Çeviren wê sibê bê spartin.
