Serokdewletê Ûkranyayê Volodimir Zelenskiy di daxuyaniya xwe ya şevê din de diyar kir ku divê Ewropa ‘nîşaneya lewaziyê’ nîşan nede. Her wiha got ku Kiev bi taybetî derbarê plana desteka derayî û cezayên nû yên li dijî Rûsiyayê de li benda biryarên şênber in.
Zelenskiy da xuyakirin ku nebûna cezayên nû cesareta Rûsyayê xurtir dike û got ku tevî vê yekê ew îhtîmala danûstandinan beralî nake. Zelenskiy, di heman demê de da zanîn ku hevdîtinên wan ên bi DYE û hevalbendên wan re berdewam dike.
LI YEKÎTIYA EWROPAYÊ DESTEKA 90 MÎLYAR EURO DI ROJEVÊ DE YE
Yekîtiya Ewropayê di dayîna paketa deynê 90 mîlyar euroyî ji bo Ûkraynayê de gihîştiye qonaxa dawî. Plan, ku rastî astengiya vetoya Macaristanê hat, bi destpêkirina pêvajoyê re tê texmînkirin ku di demek nêzîk de were çareserkirin.
Serokkomarê Fransayê Emmanuel Macron, got ku pêvajo dikare piştî hilbijartinên li Macaristanê pêş bikeve.
LI XETA ELMANYA Û RÛSYAYÊ RAGEŞÎ ZÊDE DIBE
Ji ber “gefên rasterast” ên Rûsyayê li ser hedefên Elmanyayê, Elmanya bang li sefîrê Rûsyayê kir. Ev bûyer bi daxuyaniya servîsên ewlehiyê yên Rûsyayê ku wan hemwelatiyek Elman li başûrê Rûsyayê binçav kiriye re hevdem e.
Rûsya îdîa dike ku ev kes teqemeniyan ji bo êrîşek ku ji hêla Ûkraynayê ve hatiye plankirin vediguheze.
JI FRANSAYÊ DESTEKA DADGEHA TAYBET
Wezîrê Karûbarên Derve yê Fransayê Jean-Noël Barrot anî ziman ku ew destek didin avakirina dadgeheke taybet ji bo darizandina êrîşa Rûsyayê ya li ser Ûkraynayê. Tê plankirin ku ev hewldan ji bo xebata Dadgeha Ceza ya Navneteweyî temam bike.
JI MACARISTANÊ JI BO XETÊN ENERJIYÊ BANG
Péter Magyar ku li Macaristanê di hilbijartinan de bi ser ket, ji Ûkraynayê xwest ku boriya petrolê ya Drujba ji nû ve veke. Di heman demê de, bang li Rûsyayê jî kir ku veguhestina petrolê li ser vê xetê ji nû ve bide destpêkirin.
LI HERÊMÊ ŞER DIDOME
Di encama êrîşên Rûsyayê yên li ser herêmên Dnipropetrovsk û Herson ên Ûkranyayê de qurbanî çêbûn. Di heman demê de Ûkranya êrîşa bi drone ya li bajarê Tuapse yê Rûsyayê ku di encamê de kesek bû qurbanî, girt ser xwe.
ZAROKÊN KU BI DARÊ ZORÊ HATIN REVANDIN
Europol da xuyakirin ku cihê 45 zarokên Ûkraynayî yên ku bi darê zorê li herêmên di bin kontrola Rûsyayê de hatine revandin, hatine dîtin. Rayedarên Kievê, ragihandin ku ji dema destpêkirina şer û vir ve nêzî 20 hezar zarok hatine koçber kirin.
