Rojnamevanan bi boneya 128’emîn salvegera Roja Rojnamevaniya Kurdî li bajarê Kobanê axivîn û rola dîrokî û berpirsiyariyên heyî yên çapemeniya Kurdî nirxandin. Rojnamevanan, destnîşan kirin ku ew ê tevî şert û mercên zehmet jî rastiyan binivîsin û diyar kirin ku çapemenî hêzek e ku sînorên di navbera gelan de derbas dike.
‘ROJNAMEYA KURDISTANÊ DI BIN ŞERT Û MERCÊN ZEHMET DE HAT WEŞANDIN’
Rojnamevan Leyla Ebdî diyar kir ku Rojnameya Kurdistanê ne tenê weşanek e, di heman demê de gaveke girîng e di belgekirina dîroka gelekî de ye û got, “Ev rojname di bin şert û mercên zehmet de hate weşandin. Îro gelek ajans, rojname û televîzyonên me hene. Lê dîsa jî eşkerekirina rastiyê zehmet e. Tevî vê yekê, çapemeniya Kurdî çîroka jiyan, çand û nasnameya gel vedibêje.”
‘EM ROJNAMEVANÊN ŞEHÎD BIBÎR TÎNIN’
Leyla Ebdî her wiha bal kişand ser rola yekgirtî ya çapemeniya Kurdî di erdnîgariya parçebûyî de û wiha domand, “Bi saya çapemeniya Kurdî, sînor wateya xwe winda dikin. Bûyerek ku li Rojava diqewime, li deverên din Başûr, Bakur û Rojhilatê Kurdistanê deng vedide. Ev yek hesta yekîtiyê di navbera Kurdan de xurt dike.”
Leyla Ebdî rojnamevanî wekî qadeke têkoşînê pênase kir û got, “Em kamera û pênûsên xwe wekî amûrek a têkoşînê bikar tînin. Em rojnamevanên ku şehîd bûne bi bîr tînin. Em ê li ser şopa wan li dû rastiyê bimeşin.”
‘EM Ê BI PÊNÛSÊN XWE HER LI DÛ RASTIYÊ BIN’
Rojnamevan Îvana Misto jî bal kişand ser destpêka rojnamevaniya Kurdî û behsa girîngiya vê mîrateyê kir Îvana Misto got, “Rojnamevaniya Kurdî di rojek pir girîng de dest pê kir. Rojnameya yekem li Misrê hate weşandin ji ber ku Kurdistan wê demê di bin dagirkeriyê de bû. Îro, gelek dezgehên çapemeniyê hene ku bi zimanê me weşanê dikin.”
Îvana Misto diyar kir ku çapemeniya Kurdî ne tenê çandê, di heman demê de dîrokê jî nîşan dide û wiha dewam kir, “Em ne tenê çandê, di heman demê de dîroka rastîn a Kurdistanê jî vedibêjin. Gelek rojnamevanan di vê têkoşînê de jiyana xwe ji dest dan. Em ê têkoşîna wan bidomînin. Tevî şert û mercên zehmet jî, em ê bibin dengê gelê xwe. Em ê bi pênûsên xwe her li dû astiyê bin.”
