Li dijî biryara Wezareta Perwerdeyê ya hikûmeta demkî ya Sûriyeyê ya ku ji bo fêrbûna zimanê kurdî hefteyê 3 saeet veqetandine, îro li navçeya Şêranê ya Kobanê ji aliyê mamoste, xwendekar û malbatên xwendekaran ve daxuyaniyek hat dayîn.
Daxuyanî bi zimanê Kurdî ji aliyê mamoste Alya Mistefa û bi zimanê Erebî jî ji aliyê mamoste Emel Xelîl ve hat xwendin.
Di daxuyaniyê de hat gotin ku zimanê dayikê nasname û hebûna neteweyî ye, lewma mafê perwerdeya bi zimanê dayikê mafekî gerdûnî û mirovî ye.
Mamoste û xwendekaran diyar kir ku “Sînordarkirina zimanê kurdî di sîstema pewredeyê de xizmeta hêviyên aştî, aramiya civakê û avakirina Sûriyeyeke nû û demokratîk nake.”
Di daxuyaniyê de bang li hemû aliyên peywendîdar hat kirin ku vê biryarê betal bikin û sîstema perwerdeyê li ser bingeha wekhevî, pirrengî, pirzimanî û rêzgirtina li ber mafên hemû pêkhateyan, ji nû ve saz bikin.
