Bi boneya 34’emîn salvegera şehadeta Şehîd Bêrîtan (Gulnaz Kartaş), li Kobanê, Til Temir û Beyrûtê çalakiyên bîranînê hatin lidarxistin.
KOBANÊ
Bi boneya salvegera 34`emîn ya şehadeta fermandar Bêrîtan (Gulnaz Karataş) bi amadebûna bi dehan endam û nûnerên saziyên jinan li Kobanê, çalakiya bîranînê hat lidarxistin.
Çalakiyê li hola Navenda Aboriya Jinan a Kobanê bi deqeyeke rêzgirtinê dest pê kir. Di çalakiyê de nameya şehîd Bêrîtan û nameya fîlozof Gayatrî Spivak ji aliyê endama Navenda Aboriya Jinan Dilvîn Nebî ve hate xwendin.
Çalakî bi berzkirina dirûşmên “Şehîd namirin” û “Bijî Serok Apo” bi dawî bû.
TIL TEMİR
Bi boneya salvegera 34`mîn a şehadeta şehîd Bêrîtan (Gulnaz Karataş) endamên Kongra Star li bajarê Til Temirê çalakiyeke bîranînê li dar xist.
Endamên Kongra Star li navenda xwe ya li bajêr kom bûn û şehîd Bêrîtan bi bîr anî.
Endaman bi vê boneyê li ser wesiyeta şehîd Bêrîtan şîranî amade kirin û soza şopandina rêya şehîdan da.
LUBNAN
Kongra Star û Partiya Yekitiya Demokratîk (PYD) li paytexta Lubnanê Beyrûtê, bi amadebûna bi dehan kesan, bi boneya salvegera 34`an a şehadeta Bêrîtan (Gulnaz Karataş) civînek li dar xist.
Têkoşer Bêrîtan di 25`ê Cotmeha 1992’yan de bi xiyanetî li çiyayên Kurdistanê hatibû şehîdxistin.
Di civînê de endama Kongra Star Leyla Mihemed der barê şehîd Bêrîtan û têkoşîna wê axivî, da zanîn ku Bêrîtan bi çalakiya xwe ya fedayî şopeke mezin ji bo hemû jinên li cîhanê hişt, bi çalakiya xwe diyar kir ku fikr û îdeolojî ji hemû çekan bihêztir e, mirov dikare bi fikr û felsefeya azad berevaniyê li ber doza xwe bike.
Leyla Mihemed destnîşan kir ku şehîd Bêrîtan der barê girîngî û nirxê jina Kurd de ders da dijminên wan, hêza xwe diyar kir û îsbat kir ku jin dikare ji bo xwe, gel û xaka xwe her tiştî bike.
