Ji 6’ê Çileyê ve ye êrîşên li ser Rojava yên hêzên leşkerî yên girêdayî hikûmeta demkî û çeteyên ku DAÎŞ û dewleta Tirk piştgiriya wan dike, berdewam dikin. Di serî de bajarê Kobanê gelek herêm hatine dorpêçkirin û ambargoya li ser xwarin, ceyran û pêdiviyên jiyanî yên din berdewam dike.
Tevgera Ekolojiyê ya Mezopotamyayê û TEV-EKO’yê li hemberî van êrîşan û rewşa mirovî ya giran dibe banga piştevaniya ji bo Rojava kir û li ser vê yekê aktîvîstên ekolojiyê yên ji welatên cuda daxuyaniyên piştevaniyê didin.
‘’EM JI BO ROJAVA RADIBIN SER PIYAN’’
Endamê Causeos – Critical Research Collective (Kollektîfa Lêkolîna Rexneyî) ku navenda wê li Şîlîyê ye, Alexander Panez ji gelê Rojava re peyama piştevaniyê şand.
Panez di peyama xwe de ev yek anîn ziman: ‘’Ez ji hemû gelê Rojava û tevgera şoreşgerî re piştgiriya xwe radigihînim. Ev pêvajo ji gelek komên li Emerîkaya Latîn gelekî girîng e.’’ Panez diyar kir ku wan li hemberî êrîşên hikûmeta Sûriyeyê û hêzên din ên jeopolîtîk ên li ser şoreşa li ser Rojava peyameke xurt a piştgiriyê şandiye û got: ‘’Em ji bo Rojava radibin ser piyan, li rex wê ne û em ji Şîlîyê pişteaniya xwe radigihînin.’’
‘’EM Ê BÊDENGIYA GUERNICAYÊ DUBARE NEKIN’’
Li welatê Baskê di meşa ku bi beşdariya 30 tevgerên civakî û rêxistinên civakî hate lidarxistin de, Tevgera Guggenheim Urdaibai Stopê peyama piştgiriya ji bo Rojava xwend.
Di peyamê de hate diyarkirin ku e piştevaniyê didin Tevgera Ekolojiyê ya Mezopotamyayê û Tevgera Ekolojiyê ya Ewropayê ya ji bo Kurdistanê û hate îfadekirin ku Rojava bi êrîşên rejîma Sûriyeyê ya piştevaniya dewleta Tirk distîne re rû bi rû maye.
Di daxuyaniyê de hate destnîşankirin ku êrîşan rê li ber krîzeke mirovî ya cidî vekiriye û bi sed hezaran însan ji aliyê peydakirina av, xwarin û xizmetên tenduristiyê ve di bin gefê de ne. Di peyamanê de li hemberî bêdengiya navneteweyî nerazîbûn hate nîşan dan û ev yek hatin gotin: ‘’Di sala 1937’an de beşeke cihanê ya mezin li hemberî bombebarandina Guernicayê bêdeng ma. Em ê roja îroyîn bêdeng nemînin.’’
Di daxuyaniyê de bi awayekî eşkere bang li serokên siyasî hate kirin û ji bo ku gelê Kurd di nava aşitiyê de bijî daxwaza agirbesta tam û mayînde hate kirin. Her wiha di peyamê de dirûşmeyên ‘’Jin Jiyan Azadî’’ û ‘’Em piştgiriyê didin gelê Kurd’’ hatin berzkirin.
‘’BIJÎ BERXWEDANA ROJAVA’’
Aktîvîsta Movimento dos Atingidos por Barragensê Leticia Oliveira jî diyar kir ku ew piştgiriyê didin Rojava.
Leticia Oliveira bi bîr xist ku gelê Rojava di bin êrîşên hikûmeta Sûriyeyê de ye û ev yek anîn ziman: ‘’Em piştgiriyê didin kesên li Rojava li ber xwe didin. Em di têkoşîna jiyan, serweriya gel û aşitiya li hemû cîhanê de li rex wan in.
Leticia Oliveira peyama xwe bi gotina ‘’Bijî berxwedana Rojava’’ temam kir.
Tê payîn ku wê di rojên pêşiya me de jî daxuyaniyên piştevaniya navneteweyî yên ji banga Tevgera Ekolojiyê ya Mezopotamyayê û TEV-EKO’yê re werin dayîn.
