Hevseroka Komîteya Sotemeniyê ya Taxên Eşrefiyê û Şêxmeqsûdê ya bajarê Helebê Elîf Eslan derbarê mijarê de ji ajansa ANHA’yê re axivî û diyar kir ku hikumeta veguhêz a Sûriyeyê ji hefteyekê ve rê nade ku mazot derbasî her du taxan bibe. Wê jî tevgera çûn û hatinê asteng kiriye.
Elîf ev ambargoya li ser her du taxan şiband a rejîma Baasê û got: “Kesayet hatin guhertin, lê zîhniyet heman e. Divê hikumeta veguhêz xetereya ku li hember binpêkirinên peymanê dike bizane, bi taybet der barê mijara derbaskirina mazotê de. Ji ber ku zivistan nêzîk bûye.”
Elîf anî ziman ku tevî ambargoyê jî lê komîteyê di salên borî de mazot di dawiya havînê de li şêniyan belav dikir û ev tişt anî ziman: “Ger hikumeta veguhêz di qedexeya derbaskirina mazotê de dewam bike, em nikarin belav bikin. Ji ber depoya heyî tenê dikare pêdiviya beşên xizmetguzarî û tenduristiyê dabîn bike û bide jeneratorên ampîran ên ku kehrebeyê didin malan. Nemana wê arîşe ye.”
Meclisa Giştî ya Taxên Şêxmeqsûd û Eşrefiyê û hikumeta veguhêz a Sûriyeyê di 1ˊê Nîsanê de peymanek ji 14 bendan îmze kir, lê hikumeta veguhêz pabendî peymanê û bendên wê nabe.
Elîf destnîşan kir ku binpêkirina peymanê ji hêla hikumeta veguhêz e gefên li dijî ewlehiya herêmê û aştiya navxweyî ye.
Di benda 3ˊyan a peymanê de tê gotin “Wezareta Hundirîn û Hêzên Ewlekariya Hundirîn berpirsiyarên parastina şêniyên herdu taxan in.”
Li gorî benda 8ˊan a peymanê “Tevgera çûn û hatinê ya şêniyên herdu taxan bi serbestî ye. Nabe kesekî ku destê wî bi xwîna Sûriyeyiyan nebûye û berî lihevkirinê xwestî (metlûb) bû, were girtin.”
