Endama koma Duyemîn a Aştiyê û siyasetmedar Aysel Dogan, di sala 3’yan a wefata xwe de li ser gora xwe ya li Goristana Asrî ya Dersimê hat bibîranîn. Malbata Aysel Dogan, nûnerên partiyên siyasî, Hevşaredarê Dersimê Cevdet Konak ku li şûna wî qeyûm hatiye tayînkirin û gelek kes tev li bîranînê bûn.
Bîranînê bi deqeyeke rêzgirtinê destpê kir. Piştre jî beşdaran qurnefîl danîn ser gorê û çerax hatin vêxistin. Hevserokê DEM Partiyê yê Dersimê Ozcan Ateş di bîranînê de got ku dema navê Aysel Doganê tê gotin têkoşîn, ked û aştî tê bîra her kesî. Ozcan, da zanîn ku Aysel Dogan bi hesreta aştiyê hatiye oxirkirin û got: “Di rêya hevala Ayselê de em ê heta azadî û aştî pêk tê têkoşîna xwe bidomînin. Bi vê wesîleyê em di şexsê hevala Ayselê de hemû kesên di têkoşîna azadiyê de jiyana xwe ji dest dane careke din bi bîr tînin.”
Xwişka Aysel Doganê, Menşure Dogan jî di serî de kesên di têkoşîna azadiyê de jiyana xwe ji dest dane bi bîr anî û ev tişt anî ziman: “Aysel, bi felsefeya şîva şevê taşteya sibehê jiyaye. Ji ber daxwaza aştiyê 10 salan girtî ma. Hêvîdarim hesaba van xerabaniyan were pirsîn û tu caran neyê jibîrkirin. Ji bo yên mayî û nifşê nû aştî teqez divê hebe. Me di rêya wê de tu caran xwişka xwe bi tenê nehişt. Em bi wê serbilind in. Ji bo Sakîne û Saîmeyê pir giriya.”
Kesên beşdarî bîranînê bûn, piştre jî çûn serdana gora yek ji kadroyên pêşeng ên PKK’ê Sakîne Cansizê.
