Hevserokê Partiya Demokrasî û Wekheviyê ya Gelan (DEM Partî) Tûncer Bakirhan di civîna koma meclîsê ya partiya xwe de axivî.
Bakirhan anî ziman ku nijadperestî li cîhanê belav bûye û ev yek jî dibe sedema şer, ku di encamê de bi milyonan mirov ji cih û warê xwe dibin.
Bakirhan got, “Aqlê neteweperestî û nijadperestiyê cîhanê, Rojhilata Navîn û Tirkiyeyê ber bi zinar ve dehf dide. Li cîhanê û Tirkiyeyê, hêzên neteweperest û nijadperest her roj tovên neteweperestî, nijadperestî û dijminatiyê diçînin.”
Bakirhan axaftina xwe bi vî rengî dewam kir: “Li vî welatî pîvanek heye ku nayê guhertin. Kî namerdiyê dike, kî xayintiyê dike, kî mafê kesekî dixwe, mixabin xwe li neteweperestiyê digire. Ev pêla neteweperestî û nijadperestiyê durûtî ye. Bala xwe bidin ser dîrokê, hem dîroka nêz hem jî ya dûr, neteweperestên durû bi ti awayî bi kêrî civakê nehatine. Welat hemû xebitî ye, wan jî xwarine.
Dema dawî li dijî partiya me, gelên me gotinên dijber têne kirin. Dixwazim bersivekê bidim wê. Yên ku navê me û mêtinger û emperyalîstan di heman hevokê de bilêv dikin, dixwazim vê bersivê bidim wan. Gelê Kurd jî, DEM Partî jî, partiyên ku DEM Partî ji kevneşopiya wan tên, hemû jî li djiî mêtingerî û emperyalîzmê ne, li ber rabûne û wê vê têkoşîna xwe dewam bikin. Dema ku mirov bala xwe didin ser kevneşopiya partiyên siyasî yên din, hingî şop û bandora mêtinger û emperyalîstan a li ser wan dibîne. Şikur ji Xwedê re di vê mijarê de serê me bilind e. Ji roja destpêkê ve em israr dikin; pirsgirêka bingehîn a Tirkiyeyê pirsgirêka Kurd e, çareserî jî çareseriya li nava Tirkiyeyê ye. Em ê tişta ku winda bûye li cihê lê winda bûye bigerin.”
Bakirhan du bangên girîng kir û got, “Bana destpêkê li gelên Tirkiyeyê ye. Li dijî pêla neteweperestî û nijadperestiyê, tenê aştî û demokrasî ku nirxên me yên hevpar in me dikare bi hev re bihêlin, xurt bikin. Ji ber vê yekê em bang li her kesî dikin ku tevkariyê li lihevkirineke li welêt bikin. Eger em karibin lihevkirina civakî xurt bikin, em ê karibin vê pêla neteweperestî û nijadpreestiyê rawestînin. Banga me ya duyemîn jî li aqlê dewletê ye ku ma be; hûn bi xwe jî ji nêz ve zanin ku li herêma me, li welatên cîran şerek, kaosek heye. Rêya herî baş a rizgariya ji vê yekê ew e ku li Tirkiyeyê aştiya civakî bê pêkanîn. Divê gelên Tirkiyeyê bibînin ku gefa ewlekariyê ye esasî ji Kurdan nayê, gefa esasî ew hêzên neteweperest û nijadperest e. Li hemberî vê yekê divê ji bo aştî û çareseriyê em gavê biavêjin.
Eger hîn aqlekî dewletê ma be divê vê baş zanibe; her cara ku deriyên Îmraliyê hatin vekirin, hêviya ji bo çareseriya demokratîk mezin bû, li welêt aramî pêk hat. Aboriya welêt bi pêş ket. Li Tirkiyeyê Birêz Ocalan bi salan e li ser çareseriyê israr dike. Guh bidin Birêz Ocalan, pê re rûnên û biaxivin.”
Bakirhan destnîşan kir ku êdî tenê rêyek maye û got, “Ya em ê aştiya civakî pêk bînin, sîstemeke adîl û demokratîk ava bikin, ya jî em ê teslîmî pêla neteweperestî nijadperestiyê bibin. Yanî aqlekî dewletê li holê nîne. Di sedsala nû de yekane rêya rizgariyê ji bo Tirkiyeyê demokrasî û lihevkirina bi aqlê hevpar e. Li Tirkiyeyê jî lihevkirina Tirkiyeyê ye. Ji bo gelên Tirkiyeyê yekane rêya rizgariyê, aştiya Kurd e. Sîstemeke demokratîk, adîl û azadîparêz e.”
Bakirhan diyar kir ku ew ji bo vê armancê têdikoşin.
