Serokê Dewletên Yekbûyî yên Emerîkayê (DYE) Donald Trump ragihand ku agirbesta ji 8’ê Nîsanê û vir ve di meriyetê de ye hatiye dirêjkirin. Lê belê zêdebûna buhayê petrolê, krîza li Tengava Hurmuzê û bûyerên li qadê nîşan dide ku tansiyona li herêmê neketiye.
BUHAYÊ PETROLÊ ZÊDE BÛYE
Rewşa nediyar e li Rojhilata Navîn bazara enerjiyê bi dewamî dihejîne. Buhayê petrolê li Asyayê ji sedî 4 zêde bû. Rewşa nediyar a danûstandinên navbera Îran û DYE’yê û girtîmayina Tengava Hurmuzê li ser zêdebûna buhayê petrolê bandor kir.
LI LUBNANÊ ROJNAMEVANEK HATE KUŞTIN
Li herêma el-Tiri ya li başûrê Lubnanê di êrişeke hewayî ya Îsraîlê de rojnamevan Amal Halil jiyana xwe ji dest da. Çavkaniyên parastina sivîl û rojnameya El-Ahbar a ku lê dixebitî, mirina Amal Halil piştrast kirin. Hate ragihandin ku di heman êrişê de rojnamevanek jî birîndar bû.
ÎDÎAYA ‘RAWESTANDINA DARVEKIRINAN’ A TRUMP
Donald Trump îdîa kir ku rêveberiya Îranê li ser daxwaza wî dest ji darvekirina 8 xwepêşandêrên jin berdaye. Trump anî ziman ku çar ji wan wê bêne berdan, çarên din jî wê bi cezayekî kurt ê girtîgehê bêne cezakirin.
Lê belê dadgeriya Îranê ev daxuyanî weke “Agahiya şaş” pênase kir. Rêveberiya Tehranê beriya niha îdîayên ku digotin “Jin bi cezayê darvekirinê re rû bi rû ne” red kiribû.
TENGAVA HURMUZÊ WÊ NEYÊ VEKIRIN
Serokê Meclîsa Îranê Mûhammed Bakir Galîbaf anî ziman ku heta DYE dorpêça li ser bendergehên Îranê dewam bike wê Tengava Hurmuzê jinûve neyê vekirin. Galîbaf îdîa kir ku dorpêça navborî li dijî agirbestê ye.
JI BO HEVDÎTINAN DEMEKE DIYARKIRÎ NÎNE
Qesra Spî ragihand ku ji bo danûstandinên bi Îranê re demeke diyarkirî nîne. Trump jî got, “di rojên pêş de” dibe ku hevdîtin jinûve destpê bikin.
Berdevka Qesra Spî Karoline Leavitt anî ziman ku ji bo pêşniyara ji Îranê bê demeke dawî nehatiye diyarkirin, lê belê dema pêvajoyê wê dawiya dawî ji aliyê Trump ve bê diyarkirin.
LI LUBNANÊ HILWEŞÎNA GIRAN: 62 HEZAR AVAHÎ HILWEŞIYAN, AN JÎ XISAR LÊ BÛ
Li gorî rayedarên Lubnanî di şerê zêdeyî şeş hefteyan ê bi Îsraîlê re zêdeyî 62 hezar avahî ya hilweşiyan yan jî xisar li wan bû. Sekreterê Giştî yê “National Council for Scientific Research Lebanon” Şadi Abdallah diyar kir ku di nava 45 rojan de 21 hezar û 700 xanî bi temamî hilweşiyan, xisar li 40 hezar û 500 avahiyan bû.
