Rayedarê herî payebilind ê sivîl ê Hêzên Deryayî yên Dewletên Yekbûyî yên Emerîkayê (DYE) John Phelan bi biryareke ji nişka ve ji wezîfeya xwe dûr ket. Pentagonê roja Çarşemê daxuyaniyek da û diyar kir ku Phelan dest ji wezîfeyê berdaye. Li ser sedema dûrxistinê jî ti hincet nehate eşkerekirin.
Berdevkê Pentagonê Sean Parnell li ser X’ê daxuyanî da û ragihand ku Phelan ji wezîfeyê dûr ketiye û alîkarê wî Hung Cao bi rengekî wekîl wê wezîfeya wî bike.
Ev cihêbûna ji nişka ve xeleka dawî ya lîsteya dirêj e ku piştî Donald Trump di Çileya 2025’an de ji nû ve li Qesra Spî vegeriya rayedarên payebilind ên leşkerî ji wezîfeyê hatin girtin an jî neçarî îstifayê hatin hiştin. Balkêş e ku pêvajo di demeke welê de diqewime ku DYE li hemberî Îranê şer dike.
Destpêka mehê Fermandarê Hêzên Bejahî yên DYE’yê Randy George bêyî hincetek bê eşkerekirin ji wezîfeyê hatibû dûrxistin. Bi heman rengî general David Hodne û William Green Jr jî ji wezîfeyê hatibûn dûrxistin.
Trump demeke kurt piştî ku vegeriya wezîfeyê, Serokê Fermandariya Giştî Charles Q. Brwond ji wezîfeyê dûr xistibû ku di dema Joe Biden de hatibû wezîfedarkirin.
Her wiha li gelek saziyên krîtîk ên weke hêzên deryayî, ewlekariya peravî, NSA û hêzên hewayî rêveberên payebilind ji wezîfeyê hatin dûrxistin.
