Hevserokê Giştî yê DEM Partiyê Tûncer Bakirhan di civîna gel de got ku pêvajoya diyalog û muzakereyê ya ji bo çareserkirina pirsgirêka Kurd dest pê kiriye, derfeteke dîrokî ye. Bakirhan da zanîn ku pêvajo wê bes bi piştevaniya gel ser bikeve.
Bakirhan anîn ziman ku gelê Kurd ji bo mafên xwe yên demokratîk ên ku ev sed sal in tên înkarkirin, têdikoşin û ev yek anîn ziman: ‘’Divê êdî Komar li gel naskirina hiqûqa Kurdan demokratîk bibe. Divê nasnameya Kurdan êdî bigihîje hiqûqekê. Ma naskirineke derhiqûqî dibe? Ma bêyî hiqûqê bi niyetbaşiyê pirsgirêkeke sed salî wê were çareserkirin? Aha ew mase, maseya pêkanîna wê hiqûqê ye.’’
Bakirhan piştre ragihand ku divê zimanê dayikê azad bibe, demokrasiya xwecihî û edaleta aborî li ser maseya muzakereyê werin nîqaşkirin.
Bakirhan di dewama axaftina xwe de diyar kir ku komîsyon êdî hatiye qonaxa hevdîtina li gel Rêber Apo û ev yek anîn ziman: ‘’Êdî dema hevdîtina li gel girîngtirîn aktorê vê meseleyê ye. Birêz Ocalan bi xwe, deriyekî gelekî girîng vekir û hêviyeke gelekî mezin afirand ku ger em bikaribin tiştên ku Birêz Ocalan hewl dide bike, bînin ziman û hêza li pişt mezin bikin wê demê em ê xwe bigihînin aşitiyê. Bidestxistina aşitiyê pêkan e û nêz e.’’
Bakirhan di dawiya axaftina xwe de li hemberî desteserkirina şaredariyan jî nerazîbûnên xwe nîşan dan, anî ziman ku divê girtîgeh werin valakirin û got: ‘’Divê aqilê selîm û wijdan di vê pêvajoyê de neyên windakirin. Ji bo pêşeroja vî welatî divê hemû kes ya dikeve berê xwe bike.’’
