Kongreya Asayî ya 5’emîn a DEM Partiyê li Navenda Çandê ya Nazim Hîkmet a li navçeya Yenîmahalle ya Enqereyê dewam dike. Ji Bakurê Kurdistanê û Tirkiyeyê gelek delege tevlî kongreyê bûn.
Hevserokê Giştî ya DEM Partiyê Tûncer Bakirhan di kongreyê de axivî, gelên Tirkiye û Kuridstanê silav kir û anî ziman ku Rêber Apo ji bo aştiyê hêvî da her kesî. Tûncer Bakirhan Hevşaredarê Agiriyê Mehmet Akkoç bi bîr anî.
Tûncer Bakirhan anî ziman ku ew gelek caran bi zext û zoriyê re rû bi rû man lê tevî hemû zextan jî wan dev ji têkoşîna xwe bernedan ne û li ser piyan mane. Tûncer Bakirhan destnîşan kir ku ji bo komara demokratîk ew ê têkoşîna xwe bidomînin û wiha axivî: “Lê helbet kêmasiyên me jî çêbûn. Em li vir rexnedayîna xwe didin. Me nekarî gotinên xwe bigihînin civakê û pirî caran me xwe dubare kir. Me dikarî gel û baweriyên cuda re hin têkiliyên xurt ava bikin. Mixabin hewldanên me ji bo têkoşîna xwezayê têr nekir û kêm man. Her wiha li dijî tiryakê me gelek caran kampanya bi rê ve birin lê ji bo em civakê di vî warî de bixin nava hewldanê kêmasiyên me çêbûn. Lê beguman em ê van kêmasiyan bi hev re derbas bikin. Ji bo komara demokratîk ava bikin em ê dest bi kar bikin.”
Tûncer Bakirhan di berdewama axaftina xwe de bal kişand ser krîzan û ev nirxandin kir: “Komara sed salan cilê ku ji van gelan kir jê re nebû. Lê her tim pîne kirin. Her tim krîz derketin. Em dikarin ji van krîzan xwe xilas bikin. Em bi derfeteke mezin re rû bi rû ne. Di serî de ji birêz Ocalan re û hemû aktorên siyasî ku derfeta vê pêvajoyê avakirin re spas dikin. Tirkiye ji ber neçareseriya pirgirêka Kurd krîzên mezin re rû bi rû ma. Divê serketina Kurdan ne xeter e lê weke serketin were dîtin. Serketina Kurd a Tirkan e jî. Eger Kurd bibin aktorên avakar Tirkiye dikare bi ser bikeve û xurt dibe. Weke DEM Partî em jî ji vê pêvajoyê re amade ne. Em ji hev bawer bikin û bi hev re vê pêvajoyê bi serbixînin. Em ê jî xwe biguherînin û li ser piyan bimînin. Rêya me rêya 3’yemîn e. Heta niha 2 hezên siyasî ew welat bi rê ve birin. Lê herduyan jî pirsgirêk çareser nekirin. Ne beriya AKP’ê ew welat cenet bû û ne jî di dema AKP’ê de pirsgirêk çareser bûn. Em ji bo çareseriyan amade ne. Rêya me rêya 3’yemîn e. Rêya me rêya gel, jinan û bindestan e. Ji bo serketinê em ê behtir kedê bidin. Em ji bo rêvebirina Tirkiyeyê talîp in. Kongreya me jî wê kadro û perspektîfeke ku Tirkiyeyê bi rê ve bibe ava bike. Em ê li dijî kesên dixwazin vê pêvajoyê enfekte bikin bisekinin. Em ji dema nû re amade ne. Em ê vê veguherînê bi hev re bikin. Ev kongre destpêka avakirina komara demokratîk e. Ev tov îro li Enqereyê tê çandin.”
Tûncer Bakirhan destnîşan kir ku ew temînata vê pêvajoyê ne û got, “Em ê bi wê berpirsyariyê nêzîk bibin ku ji her bihosta Tirkiyeyê xwe berpirsyar bibînin. Bila gumana kesî nebe. Sibe wê ji îro çêtir be. Em ji îro ve dest bi Tevgera Komara Demokratîk dikin.”
Kongre li çapemeniyê girtî dewam dike.
