Hevserokê Giştî yê DEM Partiyê Tûncer Bakirhan li Newroza li Stenbolê axivî, nerazîbûn nîşanî girtina Ekrem Îmamoglû da û got, “Banga Birêz Ocalan ji bo Tirkiyeyê şensek e. Vê firsendê bi dek û dolabên dadgeriyê, bi qeyûman têk nebin.”
Li Stenbolê bi sed hezaran kes tevlî pîrozbahiya Newrozê bûn. Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan li pîrozbahiyê axivî û got, “Ev Newroz di asta dîrokî de girîng e. Li dijî sîstema tekperest û înkarê, Birêz Abdullah Ocalan rêya aştiyê ava kir.”
Bakirhan got, “Birêz Ocalan li hemberî vê sîstemê deriyê aştî û demokrasiyê ava kir. Niha jî banga Birêz Ocalan 85 milyon mirovî eleqedar dike. Di Banga Civaka Demokratîk de Elewî hene, jin hene, ciwan, kedkar, teqawît û bindest hene. Em bi vê bangê re ne.”
‘EV YEK DESTPÊKEK E’
Bakirhan diyar kir ku sala 2025’an divê bibe sala guherînê û got, “Li Tirkiyeyê beriya her tiştî yên ku welêt bi rê ve dibin divê bêne guhertin. Bi qeyûman, binçavkrinan, girtinan, bi desteserkirina îradeya gel ti encam bi dest nakeve.”
Bakirhan got, “Têkoşîn neqediya. Bi gotina Birêz Ocalan ev yek destpêkek e. Ev yek destpêk e û ev meş wê dewam bike” û destnîşan kir ku divê Tirkiye êdî ne welatê ‘operasyonan’ be.
Bakirhan bang li desthilatdariyê kir ku hurmetê nîşanî îradeya gel bide û got, “Ji şaşitiyê encameke rast bi dest nakeve. Bang li vê hikumetê dikim ku dest ji vê hiqûqa şaş a 10 salan berde, hurmetê nîşanî îradeya gel, daxwazên gel bide. Banga ku Birêz Ocalan kir ji bo Tirkiyeyê şensek e. Firsendek e. Ji bo demokratîkbûnê firsend e. Li hemberî vê sîstema riziyayî, li hemberî aboriya têkçûyî banga sedsalê ya Birêz Ocalan deriyek vekiriye. Em ji vir bang li dewlet û desthilatdariyê dikin. Guh bidin vê banga sedsalê. Vê firsendê ji bo demokratîkbûnê bi kar bînin. Bi dek û dolabên dadgeriyê, bi qeyûman, bi zextê û bêdengkirina muxalefetê têk nebin.”
