Hevserokê Giştî yê Partiya Herêman a Demokratîk (DBP) Keskin Bayindir di civîna gel a li navçeya Merkezefendî ya Denizliyê de bi gel re hate cem hev. Di civîna ku li Navenda Ciwanan a Salvegera 100’an a Merkezefendî de pêk hat, rêveberên Partiya Wekhevî û Demokrasiyê ya Gelan (DEM Partî) a Denizliyê, rêxistinên navçeyan, endamên Nûnertiya Bajarên Egeyê û Îzmîrê ya DBP’ê û gelek kesên din amade bûn.
Bayindir di axaftina xwe de bi bîr xist ku nêzî salek di ser Banga Aştî û Civaka Demokratîk a Rêber Apo re derbas bûye û got: “Ji sala 1978’an ve têkoşîna me bi rêberê me re didome. Di vê pêvajoyê de me ji bo çareseriya demokratîk û aştiyane ya pirsgirêka Kurd bi dehan hewldan kirin. Berxwedana ku me li hemberî polîtîkayên înkar û asîmîlasyonê yên 200 salî pêş xist, bi têkoşîna me ya 52 salî ev çarenûs guhert.”
‘TEVÎ ZULMÊ TÊKOŞÎN MEZIN BÛ’
Bayindir tekez kir ku avakerê têkoşînê Rêber Apo ye û ev tişt anî ziman: “Her kes dipirse ku çima Bahçelî yê ku salek berê mirina me dixwest, îro destê xwe ji me re dirêj dike. Hinek îşaret bi hevsengiyên Rojhilata Navîn dikin. Lê tişta ku bi rastî em anîne vê derê, berxwedan û keda bêhempa ya gelê Kurd e. Ev pêvajo pêvajoyeke ku ji aliyê gel û dostên me ve hatiye afirandin. Me tu carî bawerî bi hêzên hegemon nekir, me her tim bawerî bi xwe kir. Dayikên Aştiyê bi salan êş kişandin, lê tu carî parastina şer nekirin. Bingehê têkoşîna me wekhevî, dadmendî û jiyana bi hev re ye. Tevî zilm û zoriyan jî têkoşîna me mezin bû.”
“HÊZA ME HEYE KU EM BIGIHIN JI BEHRA REŞ HETA EGEYÊ”
Bayindir serdana komîsyona ku di Meclîsê de hatibû avakirin a ji bo Rêber Apo bi bîr xist û bal kişand ser ku ev pêşketineke dîrokî ye û wiha got: “Cara yekemîn e ku dewlet, Rêberekî Kurd esas digire û diçe cem wî. Kesên ku hewl didin vê pêvajoyê xirab bikin hene, lê mîsogeriya vê pêvajoyê em in. Êdî divê dengê me xurttir derkeve. Berê li her derê li ber me dihat girtin; niha hêza me heye ku em ji Behra Reş bigihîjin Egeyê, heta Anatoliya Navîn jî.”
Bayindir her wiha bal kişand ser nîqaşên ku ji aliyê siyasetmedar û raya giştî ve tên kirin û got: “Yên ku Demirtaş dikin rojev, nabêjin ku yên ku ew xistin zindanê ew bi xwe ne. Behsa Birêz Ocalan dikin, lê ew hîna jî li Îmraliyê ye. Qala zimanê me dikin, lê tu gavekê navêjin.”
Di dawiya axaftina xwe de, Bayindir ji bo ku gel pêvajoyê rast fêm bike, bang li gel kir û got: “Em vê pêvajoyê ji çavkaniyên xwe, ji rojnamevanên xwe bixwînin.” Her wiha destnîşan kir ku tevlîbûna zêde ya gel li civînê “nîşaneke girîng e ka pêvajo dê çawa bimeşe.”
