Di 21’ê Sibatê Roja Zimanê Dayikê ya Cîhanê de, li gelek bajaran çalakiyên curbicur hatin lidarxistin. Komeleya Mafên Mirovan (ÎHD), Platforma Saziyên Demokratîk, Hêzên Ked û Demokrasiyê, ligel partiyên siyasî û rêxistinên civaka sivîl, li gelek bajaran daxuyanî dan û bal kişandin ser girîngiya perwerdehiya bi zimanê dayikê.
ÎZMÎR
Şaxa Komeleya Mafên Mirovan (ÎHD) a Îzmîrê, bi boneya 21’ê Sibatê Roja Zimanê Dayikê ya Cîhanê, li ber avahiya komeleyê civîneke çapemeniyê li dar xist. Ji rêveberên komeleyê Mustafa Kizartici, daxuyaniya çapemeniyê ya bi Kurdî û ya bi Tirkî jî ji aliyê Hevseroka Şaxa ÎHD’ê ya Îzmîrê Zîlan Gumuş ve hat xwendin.
Di daxuyaniyê de hat destnîşankirin ku mafê perwerdehiya bi zimanê dayikê di çareserkirina pirsgirêka Kurd û pêkanîna aştiya civakî de xwedî girîngiyeke sereke ye û hat destnîşankirin ku ji bo perwerdehiya bi zimanê dayikê pêdivî bi garantiyên qanûnî hene.
RIHA
Platforma Ked û Demokrasiyê ya Rihayê bi boneya 21’ê Sibatê Roja Zimanê Dayikê ya Cîhanê, civîneke çapemeniyê li dar xist. Endamên Platformê û Parlamenterê DEM Partiyê yê Rihayê Omer Ocalan beşdarî civîna çapemeniyê ya li ber Novada Park AVM’yê bûn.
Di çalakiyê de pankarta bi nivîsa “Ez bi zimanê xwe zikmakî heme” ya bi Kurdî, Erebî û Tirkî hat vekirin. Rêveberê Şaxa OHD’ê yê Rihayê Yasîn Aktaş metna daxuyaniyê xwend.
Aktaş destnîşan kir ku yek ji gavên herî bingehîn di çareseriya demokratîk a pirsgirêka Kurd de mafê perwerdehiya bi zimanê dayikê ye û got: “Divê mafê perwerdehiya bi zimanê dayikê bi destura bıngehin were garantîkirin. Hemwelatîbûna wekhev ne ferzkirina yek zimanî ye, qebûlkirina wekheviya zimanên cuda ye. Pirrengiya zimanî ne gef e, şertek ji bo aştiyeke adil û mayînde ye.”
Daxuyanî bi dirûşmeya “Bê ziman jiyan nabe” bi dawî bû.
