Du xet, du deng bi hev re diqîrin; berxwedan û xiyanet wê bi hev re bêne bihîstin. Sala 1992’an li Xakurkê dîrokê careke din ji şerekî qirêj re şahidî kir. Ji gerîlayên pêşeng ên PKK’ê Bêrîtan Hêvî (Gulnaz Karataş) dîroka Kurdan guhert û bi berxwedana xwe, xeta xiyanetê têk bir.
Gerîlayê HPG’ê Bawer Rûbar û gerîlaya YJA Starê Amargî Îsyan Reqa ku li ser xeta Bêrîtan li tunelên şer têdikoşin, ji ANF’ê re qala bandora vê çalakiyê ya li nava tevgera PKK’ê kirin.
Gerîla Bawer Rûbar bi bîranîna şehîdên şoreşê dest bi axaftina xwe kir û got, “Helwesta hevala Bêrîtan a li dijî xiyanetkaran gelekî girîng e. Planên PDK’ê bi bersiva hevrê Bêrîtan hate têkbirin. Berxwedana wê li her derê belav bû û di roja me ya îro de jî li gel şert û mercên giran ev berxwedan dewam dike. Bi taybetî berxwedana ku hevrêyên me niha li Zap, Metîna, Xakurkê û Bakurê Kurdistanê dimeşînin, xeta Bêrîtan temsîl dike. Dijmin li hemberî hevrêyên me her cûre çekan bi kar tîne, bi çêkên kîmyewî êrîş dike. Ev yek jî nîşan dide bê dijmin di kîjan astê de tengav bûye.
Çalakiyên hevrêyên me dijmin asê kiriye. Li gel piştgiriya PDK’ê jî dewleta Tirk li hemberî gerîla nikare bi ser bikeve. Dewleta Tirk şer tenê li ser teknîkê dimeşîne, 24 saetan balafirên keşfê digerin, bombeyan li her qadê dibarînin. Gelê me qetil dike, xiyanet û sîxuriyê ferz dikin. Li gel hemû êrîşên hovane yên dijmin jî li çiyayên Kurdistanê serwerî di destê me de ye. Dijmin li hemberî gerîla nikare şer bike û derbên giran dixwe. Ji bo baweriya gel a li PKK’ê tine bike, her roj li dijî gel şerê taybet dimeşîne. Lê belê dijmin û hevkarên wan wê ti carî bi ser nekevin.”
‘BAWERIYA ME YA BI RÊBERÊ ME RE TAM E’
Şervana Ereb Amargî Îsyan Reqa jî li ser Bêrîtan got, “Di şexsê hevala Bêrîtan de şehîdên şoreşê hemûyan bi hurmet bi bîr tînim, soza ku me dane wan, em ê teqez bi cih bînin. Mîrateya berxwedanê ya ku hevrê Bêrîtan ji me re hişt, gelekî bandor li min ikr Bi sekna ku wê demê nîşan da, helwesta ku divê em li dijî dijmin nîşan bidin, raxist pêş çavan. Ji wê rojê û vir ve berxwedan hîn jî dewam dike. Weke jineke Ereb li vê derê şer dikim, ku ev yek têkoşîna me hîn xurt dike. Divê em li ser xeta Şehîd Bêrîtan bimeşin û îradeya xwe xurt bikin. Ji bo welatê me pêwîstî bi çi hebe em ê wê bikin; weke hêzên YJA Starê em bi giraniya wezîfe û berpirsyariya xwe zanin.
Êrîşa hovane ya dijmin a li ser partiya me, nîşan dide bê çiqasî tengav bûye. Êdî nizanin bê wê çi bikin, kîjan çekê biafirînin. Li gel ku çekên kîmyewî jî bi kar tînin nekarîn berxwedana me bişikînin û niha hewl didin tiştên nû bikin. Hevrêyên me hem li tunelên şer hem jî li qadê bi çalakiyan dijmin bêçare hiştine. Baweriya me ya bi Rêbertî û dîroka me tam e. Tecrûbeyên ku me ji dîrokê wergirtine ji bo me bingeha fedakarî û têkoşînê ye. Em careke din soz didin ku li ser xeta berxwedanê ya Şehîd Bêrîtan û Zîlan bimeşin.”
