Hevseroka Partiya Yekîtiya Demokratîk (PYD) Sema Bekdaş diyar kir ku êrîşên li ser Rojava parçeyek ji plana navnetewî ne û gel ji roja ewil ve bi biryardarî berxwedana xwe ya xweparastinê didomîne.
“ÊRÎŞ PARÇEYÊK JI PLANA NAVNETEWÎ NE”
Sema Bekdaş bal kişand ku nêzî 6 mehan e êrîş li ser herêmê didomin û wiha got: “Van êrîşan li taxa Şêxmeqsûd û Eşrefiyê destpê kirin. Ev êrîş parçeyek ji pêvajoya guherîn û veguherînê ya li Rojhilata Navîn in. Li Sûriyê û Kurdistanê guherînên mezin çêdibin. Ev êrîş berdewamiya plana li ser herêmê ne.”
“GELÊ ME LI HER QADÊ BERXWEDANA XWEPARASTINÊ DIDOMÎNE”
Sema Bekdaş diyar kir ku gel ji roja ewil ve heta niha berxwedana xwe didomîne û wiha axivî: “Hemû gelê me li hemû bajar û taxan berxwedana xweparastinê didomîne.” Sema Bekdaş bal kişand ser hemû eniyên şer ên ku şervan bi lehengî û fedakarîya mezin tevdigerin û berxwedana ku li Rojava, Ewropa û her çar parçeyên Kurdistanê mezin dibe silav kir.
Bekdaş got ku têkoşîna gelê Kurd a li dijî terora DAIŞ’ê ji bo mirovahiyê dîrok nivîsiye û wiha domand: “Em vê berxwedana dîrokî ya sedsalê silav dikin. Berxwedana gelê me ya li dijî terora DAIŞ’ê ji bo mirovahiyê, ketiye nav rûpelên dîrokê.”
“GELÊ ROJAVA TESLÎMIYETÊ QEBÛL NAKE”
Di berdewamiya axaftina xwe de Sema Bekdaş diyar kir ku şer çareseriyeke mayînde nayîne û ji ber ku pirsgirêkên siyasî nehatine çareserkirin, dixwazin di navbera herêman de fitne û nakokî bên çêkirin. Û got ku rêveberiya demkî ya Şamê salek e li Sûweyda, peravê, Bakur û Rojhilatê Sûriyê parçebûnê gêş dike û gelê me li dijî vê helwesteke zelal nîşan daye.
Sema Bekdaş wiha got: “Gelê me dixwaze destkeftiyên xwe biparêze. Gelê Rojava teslîmiyetê qebûl nake. Ji destpêka şoreşê ve gelê me berxwedaneke mezin nîşan da û destkeftiyên xwe parast.”
“BERXWEDAN YEKÎTIYA KURDAN XURT KIR”
Sema Bekdaş diyar kir ku têkoşîna gelê Kurd li cîhanê belav bûye û li Hesekê, Qamişlo û hemû bajaran gel teslîmiyetê red dike û wiha dawî li axaftina xwe anî: “Îro li Hesekê, Qamişlo û hemû bajaran gelê me teslîmiyetê qebûl nake. Bi vê berxwedanê gelê me yekîtiya xwe xurt kir.”
