Li dijî êrîşên dewleta Tirk a dagirker û komên wê yên çete, nobeda gelên Bakur û Rojhilatê Sûriyeyê ya li ser Bendava Tişrînê dewam dike. Berxwedana li dijî êrîşan di roja 69’an de ye. Şêniyên kantona Firatê bi ciwan û extiyarên xwe, bi govend, stran, dirûşm û tilîliyan çalakiya nobedê bi moraleke mezin dewam dikin. Girseya gel tim û tim dirûşma ‘Bijî QSD’ diqîre û radigihîne ku wê li dijî êrîşan berxwedana xwe heta dawiyê dewam bikin.
Dayika 2 zarokan Edûl Xwedêda ji ANF’ê re axivî û anî ziman ku wê zarokên xwe radestî dayika xwe kiriye û tevlî berxwedanê bûye. Edûl Xwedêda got, “Ji bo parastina av, ax, elektrîk û enerjiya xwe cara duyemîn e tevlî çalakiyê dibim. Weke jin bi dirûşm û tilîliyên xwe em ê bi berpirsyariya xwe rabin.”
