Di ser êrîşa xwekuj li dijî ciwanên ku dema dixwestin beşdarî avakirina bajarê Kobanê yê Bakur û Rojhilatê Sûriyeyê bibin û ji zarokan re pêlîstokan bibin, li navçeya Pirsûs a Rihayê kom bûn, 10 sal derbas bûn.
Ciwanên ku di çarçoveya kampanyaya ku ji aliyê Federasyona Komeleyên Ciwanên Sosyalîst (SGDF) ve bi dirûşma “Me bi hev re parast, em ê bi hev re ava bikin” hatibû destpêkirin de kom bûn, dixwestin di 20’ê Tîrmeha 2015’an de berî ku ber bi Kobanî ve biçin, li Navenda Çanda Amara daxuyaniyekê bidin. Êrîşa xwekuj a DAÎŞ’ê bû sedema mirina 33 kesan û birîndarbûna zêdetirî 100 kesan.
Kesên ku di qetlîamê de jiyana xwe ji dest dabûn, li gelek bajaran bi çalakiyên cuda ve hatin bibîranîn.
HATAY
Okan Pîrînç ê ku di qetlîamê de jiyana xwe ji dest da, li ser goristana xwe ya li navçeya Antakya ya li Hatayê hat bibîranîn. Tevî malbata Pîrînç, malabta Halîl Aksakal (Mazlûm Aktaş) ê k udi 18’ê MLKP’î û di 18’ê Hezîrana 2015’an de li Bakur Rojhilatê Sûriyeyê encama teqîna mayînê jiyana xwe ji dest dabû, nûnerên ji Însiyatîfa Malbatên Pirsûsê, partiyên siyasî û saziyên civakî beşdarî merasîma bibîranînê bûn.
Li ser navê Însiyatîfa Malbatên Pirsûsê Osman Kara, diyar kir ku dengê ku li pêşiya Navenda Çandê ya Amarayê bilind bû, di 10 salan de bû dengê milyon kesan û ev tişt got: “Edaleta ji bo Pirsûsê, ji bo her kesî ye. Di 10’emîn salvegera qetlîamê de em daxwaza xwe ya edaletê dubare dikin. Bila hemû berpirsiyarên doza Pirsûsê bên darizandin. Em soza bicihanîna xeyalên 33 ciwanan didin.”
RIHA
Kasim Deprem û Osman Çîçek, li navçeya Pirsûsê li ser gora xwe hatin bibîranîn. Di merasîmê de dirûşma “Şehîdên Pirsûsê nemir in” hat berzkirin û li ser navê Platforma Ked û Demokrasiyê ya Rihayê, Hevserokê Şaxa Hiqûqnasên Ji Bo Azadiyê (OHD) ya Rihayê Yasîn Aktaş axivî.
Merasîm, piştî danîna qurnefîlan li ser goran bi dawî bû.
ŞIRNEX
Ûgûr Ozkan (Hogir), li ser gora xwe ya li navçeya Cizîr a Şirnexê hate bibîranîn. Tevî malbata Ozkan, nûnerên MEBYA-DER, endamên Dayikên Aştiyê yê Şirnexê, nûnerên partiyên siyasî, hevşaredarê DEM Partiyê û gelek kesên din beşdarî merasîma bibîranînê bûn.
Bavê Ozkan Mehmet Ozkan, got: “Ûgûr şehîdê têkoşînê ye. Dema şehîd bû partî, xwedî lê derket. Serê min, bi kurê min ve bilind e. Em gelekî bindest in.”
Bibîranîn, piştî danîna çîçekan li ser gorê ve bi dawî bû. Piştre li avahiya Rêxistina DEM Partî ya Navçeyê, ji bo bibîranîna kesên di qetlîamê de jiyana xwe ji deset dane sînevîzyon hat nîşandan.
AMED
Li Amedê Veysel Ozdemîr û Nazli Akyurek li ser gorên xwe hatin bibîranîn. Nûnerên partiyên siyasî û saziyên civakî yên ku bi pêşengiya Însiyatîfa Malbatên Pirsûsê hatin cem hev. Di despêkê de Ozdemîr li ser gora xwe ya li Goristana Yenîkoy a li Rezan hat bibîranîn.
Piştre Nazli Akyurek, li ser gora xwe ya li Goristana 450 Evler hat bibîranîn. Endamê SDGF’ê Mûhammed Altinkaya got: “Dê navên 33 ‘Rêwiyên Xeyalan’ neyê jibîrkirin û tu xeyalên nîvco nemînin.”
Parlamenterê DEM Partiyê Berdan Ozturk, got: “Ji bo cihbicikirina xeyalên wan em ê têkoşîna xwe mezin bikin.”
Di merasîmê de qurnefîl danîn li ser goran.
DÊRSIM
Çagdaş Aydin, li ser gora xew ya gundê Guney Konak ê li navçeya Pûlûr a Dêrsimê hat bibîranîn. Beşdarên merasîmê, qurnefîl li ser gorê danîn.
COLEMÊRG
Suleyman Aksû, li ser gora xwe ya li navçeya Gever a Colemêrgê hate bibîranîn. Gelek kes beşdarî merasîmê bûn û li ser gora wî wêneyên wî, pêlîstok û qurnefîl hatin danîn.
