Di hefteya borî di serî de li Moskow û St. Petersburg di nav de li gelek bajarên mezin ên Rûsyayê di înternet û xizmetên ragihandina mobîl de astengiyên cidî hatin jiyîn. Li gorî bloga teknolojiyê ya Rûsyayê Kod Durova, operatorên sereke yên telekomunîkasyonê yên welêt, MTS, Megafon, Beeline û T2 ji van qutbûnan bandor bûne.
Hat ragihandin ku li hin deveran ji ber qutbûnê ragihandin bi tevahî rawestandiye, lê li çend kolanan dûr bi awayekî normal dixebitin.
KREMLÎN: JI BER EWLEHIYÊ YE
Operator diyar dikin ku pirsgirêk ji binesaziya wan derneketiye. Şîrketa T2 daxuyanî da rojnameya aborî ya Rûsî Kommersant û diyar kir ku tor bi awayekî normal dixebite û ti arizeyeke teknîkî nehatiye tespîtkirin.
Berdevkê Kremlinê Dmitry Peskov diyar kir ku sînordarkirina înternetê “ji ber sedemên ewlehiyê û di çarçoveya qanûnî de” pêk hatiye.
GOTEGOTÊN DARBEYÊ, TEORIYÊN KOMPLOYÊ
Bi qutbûnan re li ser medyaya dîjîtal gelek îdîa derketin holê. Kanala Telegramê ya Rûsî VChK-OGPU ku xwe dispêre çavkaniyên ewlehiyê, îdîa kir ku hin derdor li ser hewldanek darbeyê nîqaş dikin. Lê kanal bi xwe ev îdîa wekî “teoriyek komployê” bi nav kir.
Gotegot bi taybetî li dora Wezîrê Parastinê yê berê Sergey Şoygu hatin kirin. Piştî kesê nêzîkî Şoygu û cîgirê wezîrê parastinê yê berê Ruslan Tsalikov bi gumana gendeliyê hat girtin, qutbûn destpê kirin.
PISPOR BI GUMAN NÊZÎKÎ DIBIN
Pispor bi baldarî nêzî îdîayên darbeyê dibin. Nivîskarê “Riddle Russia” Anton Barbashin ji Kyiv Independent re axivî û van îdiayan wekî “beredayî” bi nav kir. Hîndekara London School of Economics Tomila Lankina diyar kir ku gotegotên bi vî rengî “xwesteka” kesên ku bi salan e li Rûsyayê guherîna rejîmê hêvî dikin in.
QUTBÛNA ÎNTERNETÊ DI SALÊN DAWÎ DE ZÊDE BÛ
Li gorî ajansa medyaya serbixwe ya Rûsî Meduza qutbûna înternetê di sala dawî de zêde bûye. Rayedar îdîa dikin ku ev tedbîr tedbîrek ewlehiyê li dijî balafirên bê mirov ên Ukraynayê ne.
Serokê Rûsyayê Vladimir Putin di meha Sibatê de qanûnek nû îmze kir ku rayeya girtina torên telekomunîkasyonê dide Servîsa Ewlehiyê ya Federal (FSB). Ev sererastkirin rê li ber qutbûna înternetê vekir.
