Şêwirmendê Ewlekariya Neteweyî yê berê yê Dewletên Yekbûyî yên Emerîkayê (DYE) John Bolton ji Medya Haber TV bersiv da pirsên rojnamevan Erem Kansoy.
Bolton anî ziman ku di dema Serkkomar Erdogan de polîtîkaya Osmaniya nû ya Tirkiyeyê bi rengê piştgiriya ji bo komên Îslamî yên radîkal ava bû û êrişên li derveyî sînor ên li hemberî Kurdan, piştgiriya ji bo Hamasê, her wiha rola di guhertina rejîma li Sûriyeyê de weke parçeyên vê polîtîkayê nirxand.
Bolton diyar kir ku Erdogan bi daxwaza serweriya li Sûriyeyê destwerdanên yekser dike, her wiha hêzên wekÎl bi kar tîne, statuyeke gengaz a xweser a Kurd a li Sûriyeyê li dijî berjewendiyên xwe dibîne û got, “Ji bo Kurdên li Sûriyeyê serdemeke gelekî xetere ye. Hem ji ber zexta yekser a ji sînorê Tirkiyeyê tê, hem jî bi destê el Şara.”
EM NE BAWER IN KU RÊVEBERIYA TRUMP FÊHM KIRIYE
Bolton anî ziman ku ew ne bawer e di nava rêveberiya Trump de ji bo pirsên ‘Rojhilata Navîn a çawa têkiliyeke çawa ya bi Kurdan re’ bersiveke şênber hebe û axaftina xwe bi vî rengî dewam kir, “Artêşa DYE’yê General Mazlûm û karên QSD’ê yên li dijî DAÎŞ’ê gelekî hêja dibîne. Gelek kesên li Washingtonê bi fikar in ku DAÎŞ ji nû ve bi ser xwe ve bê û bibe xwedî hêz. Dibe ku weke berê nikaribe qadekê kontrol bike, lê belê ev kom dikare weke hêzeke terorê vegere. Yên ku bi rola Kurdan a têkbirina DAÎŞ’ê ya li Iraq, Sûriye û Tirkiyeyê zanin, dixwazin ew bêne parastin. Li gorî tecrûbeyên xwe yên ji dema destpêkê ya Trump dikarim vê bibêjim; Em ne bawer in ku fêhm kiriye bê ev mijar çiqasî tevlîhev e, yan jî ne bawer in ku girîngiya karên ku Kurdan ji bo parastina DYE û hevalbendên wê kirine hatibe fêhmkirin.”
EZ JI NÊZÎKATIYA ERDOGAN A LI PÊVAJOYÊ BI FIKAR IM
Têkildarî pirsa li ser Pêvajoya Aştî û Civaka Demokratîk a li Tirkiyeyê dewam dike, Bolton destnîşan kir ku wê bi kêrî her kesî be ku şer bi dawî bibe û welatiyên Kurd bi rengekî tam karibin tevlî siyaseta Tirk bibin. Bolton got, “Ya ku ji derve xuya dike ew e ku Erdogan li hundir di nava tengaviyeke mezin a siyasî de ye. Nikare bê gotin ku ji Erdogan hez dikim; ne bawer im bê çiqasî bawerî pê bê. Demeke dirêj e ez wê yekê difikirim ku divê avaniyeke Kurd a serbixwe hebe. Eger ev yek beriya bi salan ava bû ba, Rojhilata Navîn wê hîn aştiyane bûya. Ez nizanim bê îro ev yek çiqasî pêkan e, lê belê ji hewldanên lihevkirinê yên Erdogan bi guman im; di wê baweriyê de me ku teqez hesabekî xwe yê veşartî heye. Hêvî dikim ku encameke aştiyane wê jê derkeve, lê belê weke ku min got, ez bi guman im.”
