Bi pêşengiya Partiya Herêmên Demokratîk (DBP), Partiya Wekhevî û Demokrasiyê ya Gelan (DEM PartÎ) û Tevgera Jinên Azad (TJA) têkildarî desteserkirina Şaredariya Bajarê Mezin a Wanê, li pêşiya Wan MALL Wan’ê daxuyanî hate dayin. Bi beşdariya Berdevka Partiya Wekhevî û Demokrasiyê ya Gelan (DEM Partî) Ayşegul Dogan daxuyanî hate dayin û gelek nûnerên partiyên siyasî û welatî jî tevlî bûn. Girseyê gelek caran dirûşma “Qeyûmê diz ji Kurdistanê bicehime”, “Gelê Wanê li vir e li cem îradeya xwe ye” û “Abdullah Zeydan û Neslîhan Şedal rûmeta me ne” berz kir.
Parêzer û Hevserokê DBP’a Wanê Cemal Demîr ewil axivî û wiha got: “Dayiken Aştiyê û bi rûmet, di 11’ê Sibatê de 5’emîn Dadgeha Cezayên Giran a Amedê li dijî qanûnê ceza li hevşaredarê me yê Wanê birî. Bi vê yekê rêya qeyûm vekirin. Em her dem dibêjin; dadgeha ku biryar da ne dadgeh bû. Berê biryara xwe dabûn. Maskeya dadgeriyê xistin rûyê xwe. Di esasê xwe de ew ne dadger in. Ew karmendên desthilatê ne. Desthilat çi bibêje ew li gorî wê biryarê didin. Ji 11’ê mehê û şûnde gel li vîna xwe xwedî derket. Birêz Abdullah Zeydan gotibû ‘Vîna mirovan rûmeta mirovan e.’ Vîna gelê me rûmeta me ye. Em ê li her derê û her dem biparêzin. Em dibînin ku îro ji her derê polîs anîne Wanê û bajar dagir kirine. Şaredarî dagir kirine. Ev li dijî hiqûq û mirovahiyê ye. Ev ne zagonî ye.
‘GELÊ ME TU CARÎ RADEST NABE’
Gel û ciwanên me dirûşmên herî rewa berz bikin jî wekî tawanbarî qebûl dikin. Ciwanên me rastî tundî û êşkenceya polîsan tên. Ciwan dibêjin ‘Berxwedan jiyan e, qeyûm talan e.’ Em jî her dem û li her derê dibêjin Qeyûm talan e û berxwedan jiyan e. Di vê berxwedanê de em dibîn ku polîs êrişî ciwanên me dikin û îşkence li wan dikin. Heta niha polîsan zêdetirî 400 kes binçav kirin. Zêdetirî 90 kes rastî îşkenceya polîsan hatin. Ji wan nêzî 56 kes zarok in. Zêdetirî 40 kes girtin û şandin zindanan. ÎHD, OHD, TÎHV û Baro dê encama van êşkence, girtin û binçavkirinan bi raya giştî re parve bike. Gelê me tu carî radest nabe. Dê roj bê ew ê xwe bispêrin merhameta gelê me. Dê roj bê ev kesên neheqiyê dikin dê xwe bispêrin edaleta gelê me.”
Berdevka DEM Partiyê Ayşegul Dogan jî di daxuyaniyê de wiha got: “Ev salek e hûn li ser piyan in. Salek e hûn dîrokê dinivîsin. Hûn dîroka berxwedana xwedîderketina vîna gel dinivîsin. Ev ne tenê xwedîderketina gelê Wanê ye. Ev kesên îro qala sindoqan û rewabûna vîna gel dikin, divê baş li Wanê binêrin. Divê baş li vê berxwedanê binêrin. Me wekî gelê Kurd gelek tişt dîtin. Em hema wisa ji rêzê nabêjin ‘Berxwedan jiyan e, qeyûm talan e.’ Ji bo me her dem û her der bûye berxwedan. Afirandin ne tiştekî hêsan e. Em dixwazin jiyanek nû biafirînin. Em dixwazin aştî û lihevhatinek mezin bidin destpêkirin. Em dixwazin wekî gelê Kurd bibin pêşengê vê lihevhatinê. Bibin pêşengê vê aştiya bi rûmet û mayinde. Lewra îro sekna we ne tenê sekna Wanê ye. Gelê Tirkiyeyê divê peyama Wanê baş bibihîze. Bi rêya qeyûman dixwazin li Wanê talanê pêş bixin. Berê jî me gotibû ev qeyûm ne tesadûfî ye. Ji dîrokê heta niha li ser gelê Kurd serdestî û zordestî hemû polîtikayên înkar û îmhayê herî zêde li ser gelê Kurd pêş ketiye. Hemû tiştên înkar û îmhayê, sirgûnkirin û girtinê bêtir li ser gelê Kurd pêş ketiye.
‘EM LI HÊVIYA BANGA RÊZDAR ABDULLAH OCALAN IN’
Heke li welatekî zilm hebe, gelek tune bê hesibandin, gelek bindest be, ev gel li vî welatî ne azad e. Heke gelê Kurd xwe wekî hemwelatî nikaribe bihesibîne, sedema vê yekê polîtîkayên dewletê ne. Îro em dixwazin li vê kolanê bi awayekî demokratîk dengê xwe bilind bikin. Hûn bi rojan li vir in. We gelek sir û seqem, ba û bahoz dît. Lê we dîsa dest ji têkoşînê berneda. Em îro dixwazin bi hevre peymaneke nû li vî welatî çekin. Em dixwazin bi gel û baweriyên din re peymaneke nû çêbikin. Em dixwazin bi nasnameyên ku heta îro li ser vê axê tune hatine hesisandin re çüêkin. Em li heviya banga Rêzdar Abdullah Ocalan in.
Em çima ji birêz Ocalan bawer in? Ji ber ku em dizanin. Me ceribandiye. Me di dîrokê de jî dîtiye. Herî kêm 30 sal in gelê Kurd û rêzdar Abdullah Ocalan jiyanek mayinde û bi serbilindî dixwazin. Dixwazin şer bi dawî bibe. Divê ev şer bi awayekî xelas bibe ku ev lihevhatina civakî bibe lihevhatina salane. Sed salên ku hatine windakirin, divê cereke din neyê windakirin. Ji ber vê yekê ev qonax gelek girîng e. Divê em bi hevî û em bi coş bin. Divê me ji xwe bawer bin.
‘DIVÊ EM DEST JI BERXWEDANÊ BERNEDIN’
Baweriyên xwe neşkînin. Bi qeyûman nikarin baweriya me bişkînin. Wan ya me ye. Gelê Wanê beriya hilbijartinê digot dê her 14 şaredariyan bi dest bixin. We bi dest xist. Desthilatê 3 caran ev yek ceribandin lê encam negirtin. Vîna gel bi ser her tiştî re ye. Hêza herî mezin e. Tu hiqûq û bawerî nikare vîna gel bi vî rengî înkar bike. Divê em dest ji berxwedanê bernedin. Divê em ji xwe bawer bin. Em ê bêtir xwedî derkevin û bêtir xwe bi rêxistin bikin. Em ê li hebûna gelan xwedî derkevin.
Serokkomar îro got ‘îtîbara sindoqan her tişt e û divê bên parastin.’ Lê sindoqên li Wanê hatin danîn û gelê wanê dengê xwe dan, îro vîna wan tune tê hesibandin. Îro îtîbara gelê Wanê nayê parastin. Kesên li erdnîgariya Kurdistanê deng dane hûn dengê wan û vîna wan înkar dikin. Li tevahiya Tirkiyeyê li tu bajarî wekî bajarê Wanê vînek wisa xurt derneketiye. Ev dîrok e. Dewletê bi hemû derfetên xwe seferber kir. Lê dîsa nekaribû şaredariyê bi dest bixe. Em bawer in gelê Wanê dê li vîna xwe xwedî derkeve. Kesên dixwazin bi girtin, binçavkirinê çareser bikin, derê wan ne çareserî ye. Lîstikên wan ên biçûk dê encam negirin. Gelê Kurd tê bi têkoşîna xwe lîstikên wan pûç bikin. Kesên em bi hevre rê diçin kezaba tevan şewitî ye. Îro kesên ji bo aştî û demokrasiyê têdikoşin nikarin azad xwe bi rêxistin bikin. Nikarin azad xwe bi rêve bibin. Ev meseleya welatekî û Tirkiyeyê ye. Divê ev mesele çareser bibe. Ev mesele çareser nebe, em ê nikaribin rê li pêşiya qeyûman bigirin. Dê qeyûm li hemû bajarên Tirkiyeyê belav bibin. Divê hemû kesên xwe wekî parezvanên mafên mirovan bibîne, bibin yek û têbikoşin. Em ji we bawer in.”
Piştî daxuyaniyê, girse heta avahiya DBP’a Wanê meşiya. Di meşê de gelek caran dirûşmên “Abdullah Zeydan rûmeta me ye” û “Neslîhan Şedal rûmeta me ye” hatin berzkirin.
