Jin bi kincên xwe yên gelêrî û neteweyî li Qada Azadiyê li hev kom bûn û li ber dirûşma “Jin, Jiyan, Azadî” govend gerand. Piştre jî bi pankart û dowîzan dest bi meşê kir û li Parka Jinê ya 8’ê Adarê daxuyaniyek da.
Parlamenterên Partiya Demokrasî û Wekheviyê ya Gelan (DEM Partî) Salîha Aydenîz û Bêrîtan Guneş Altin jî beşdarî meşê bûn.
Bêrîtan Guneş Altin daxuyanî da, bal kişand ser tundî û komkujiyên li hemberî jinan û anî ziman ku li Rojava êriş li dijî berxwedana jinê hate kirin.
Bêrîtan Guneş Altin got, “Kes wê nikaribe berxwedana ‘Jin, Jiyan, Azadî’ tine bike. Em ê jinan bi rêxistin bikin. Em ê felsefeya Jin, Jiyan, Azadî li tevahiya cîhanê belav bikin. Em ê azadiya jinan biafirînin.”
Piştre aktîvîsta TJA’yê Ayla Akat Ata axivî û diyar kir ku meş ne tenê ji bo 8’ê Adarê ye, ew di her roja salê de ji bo azadiya jinan têdikoşin.
Ayla Akat Ata got li dijî kuştina jinan banga rêxistinbûnê kir û diyar kir ku ew ê piştevaniyê mezin bikin û destê ku jinan dirêj kiriye wê li hewa nemîne.
