Çalakiya li Mêrsînê li pêşiya Girtîgeha Kampusê ya Tarsusê hate lidarxistin. Endam û rêveberên DEM Partiyê yên Mêrsîn û navçeyê wê, Dayikên Aştiyê, Parlamenterê DEM Partiyê yê Mêrsînê Alî Bozan û gelek xizmên girtiyan tevlî bûn. Di çalakiyê de çalakvanan pêşmalkê “Tecrîd sûcê li dijî mirovahiyê ye” li xwe kirin û gelek caran dirûşmên “Girtiyên siyasî rûmeta me ne” û Bijî berxwedana zindanan” berz kirin.
‘BILA GUTTÛGO Û MUZAKERE BÊN PÊŞXISTIN’
Hevserokê DEM Partiyê yê Bajar Reşat Aşan di çalakiyê de xwest ku tecrîda girankirî û rewşa agahînegirtina mutleq a li ser Rêberê Gelê Kurd Abdullah Ocalan bê bidawîkirin. Aşan, got ku israra di tecrîdê de tê wateya israra di şer de û wiha pê de çû: “Em li vir bangî îktîdarê dikin; dawî li tecrîda ser birêz Abdullah Ocalan bînin û bingehê ava bikin ku rola xwe ya di aştiyê de bilîze. Li Tirkiye, Kurdistan û Rojhilata Navîn şer her ku diçe dijwartir dibe. Sedema şer jî ew e ku desthilatdarî aştiyê naxin rojeva xwe û nahêlin hewldanên muxatabiyê pêş bikevin. Yên di şer de israr dikin, xerabiyê li vî welatî dikin. Divê ev şer bê bidawîkirin û tecrîda li ser birêz Abdullah Ocalan bê rakirin. Bila guftûgo û muzakere bên pêşxistin. Heke pirsgirêka Kurd li Tirkiyeyê çareser nebe, dê aştî neyê deverên din ên Rojhilata Navîn jî. Em kesên di polîtîkaya şer de israr dikin şermezar dikin. Çareseriya pirsgirêka kurd, guftûgo û muzakere ne.”
Parlamenter Alî Bozan jî ev tişt anî ziman: “Em li pêşiya Girtîgeha Tarsusê bang dikin û dipirsin; daxwaza me zelal e. Em dibêjin; bila li Girtîgeha Girava Îmraliyê qanûn bikeve meriyetê, hiqûq bikeve meriyetê. Ka li vê Girtîgeha Tarsusê çi hiqûq di meriyetê de be, bila heman hiqûq li Girava Îmraliyê jî bikeve meriyetê. Em ji desthilatdariya AKP-MHP’ê dipirsin; ma Girtîgeha Îmraliyê ne xaka Komara Tirkiyeyê ye? Gelo we firotiye DYA, Rûsya û hwd. haya me jê tune ye? Em dizanin ku li Girava Îmraliyê hiqûq tune ye. Heta ku li Girava Îmraliyê hiqûq dikeve meriyetê, heta tecrîda girankirî ya li ser birêz Abdullah Ocalan tê rakirin û pirsgirêka Kurd bi rêyên aştiyane û demokratîk tê çareserkirin dê têkoşîna me bidome. Dema aştî û aramî hate vê xakê dê desthilatdarî jî bi dawî bibe. Lewma di şer û tecrîdê de israr dikin. Em dibêjin ku dê hem tecrîdê bi dawî bikin hem jî dê aştî û aramiyê bînin vî welatî û dawî li desthilatdariya AKP-MHP’ê bînin.”
Daxuyanî piştî çalakiya rûniştinê ya 5 deqeyan bi dawî bû.
ÎZMÎR
Komeleya Piştevanî û Alîkariyê ya bi Malbatên Girtî û Hikumxwaran re ya Egeyê (EGE TUHAY-DER) û malbatên girtiyan jî li ber Girtîgeha Kiriklar a Bûcayê hatin bahev. Aktîvîstên Tevgera Jinên Azad (TJA) Nûnertiya Partiya Herêmên Demokratîk (DBP) a Herêma Egeyê û nûnerên Jinart Hunerê tev li çalakiyê bûn. Di çalakiyê de pankarta “Ji bo edaletê em tecrîdê rakin ji bo aştiya civakî em deng bidin azadiyê” hate hilgirtin.
Hevseroka DEM Partiyê ya Bajêr Vezan Karabûlût a di çalakiyê de axivî, wiha got: “Bi hefteyan e dengê me li dîwaran dikeve û bi paş ve tê. Zarokên me, mirovên me li girtîgehan tên tecrîdkirin, înfazên wan tên şewitandin, ceza tên dayîn. Girtiyên 30 salan nayên berdan. Di demekî nêz de ceza dan girtiyên jin. Em dibêjin ev pêkanîn derveyî mirovahiyê ne, divê demildest ev pêkanîn tecrîda li girtîgehan bi dawî bibin. Em careke din bi hev re dibêjin ji tecrîda girtîgehan re na.”
‘EM ALÎGIRÊ AŞTIYÊ NE’
Endama Meclisa Dayikên Aştiyê û malbata girtiyan Medîne Kaymaz a pişt re axivî jî ev bang kir: “Em dayikên aştiyê ne. Bêyî cudatiya tirk û kurdan em ji bo hemû cîhanê aştiyê dixwazin. Heta ku Serokê Gelê Kurd dîl girtî be dê ev zilm xelas nebe, aştî neyê Tirkiyeyê. Divê hemû Tirkiye vê bizane. Em alîgirê aştiyê ne ne yê zilmê ne. Zilma li ser Kurdan û şerê li Kurdistanê bidin rawestandin.”
Daxuyanî bi dirûşmeyên “Ji tecrîdê re ji girtiyan re azadî” , “Bijî berxwedana zindanan” û “Jin jiyan azadî” bi dawî bû.
