Dewleta Tirk a dagirker û çeteyên girêdayî wê ji 8’ê Kanûnê û vir ve bêy navber êrîşê Bendava Tişrîn û Pira Qerekozaxê dikin. Li dijî êrîşan gelê Bakur û Rojhilatê Sûriyeyê di 8’ê Çileyê de li Bendava Tişrînê dest bi çalakiya nobetê kiribûn û ev çalakî hê dewam dike.
Çalakiya nobetê ji aliyê şêniyên Kantonên Cizîr, Reqa, Tebqa û Firatê ve bi awayekî dorveger tê dewamkirin. Lê dewleta Tirk a dagirker û çeteyên girêdayî wê bêy navber êrîşê çalakvanên nobetê yên li bendavê dikin. Di 8’ê Çileyê de dewleta Tirk a dagirker li dijî karwana yekemîn a ku berê xwe dabûn bendavê bi balafirê şer êrîş pêk aniye û di encamê de 5 sivîl şehîd bibûn û 15 sivîl jî birîndar bibûn. Tevî van êrîşan jî gel paşve gav navêje û çalakiya xwe dewam dike.
Dewleta Tirk û çeteyên wê duh careke din, karwana ku ji bo nobetê dewr bigire berê xwe dabû bendavê hedef girtin. Tevî ku bi dehan caran balafirên şer bombe barand jî gel paşve gav neavêt û xwe gihandin bendavê. Lê dewleta Tirk a dagirker vê carê jî gelê ku bi berxwedanê xwe gihandiye bendavê hedef girt, di encama bombebaranê de 4 sivîl şehîd bûn û 19 sivîl jî birîndar bûn.
Çalakvanên nobetê yên li Bendava Tişrînê ji ANF’ê re axivîn, destnîşan kirin ku ew ê li dijî hemû êrîşên dewleta Tirk a dagirker berxwedana xwe dewam bikin.
‘ÇI DIBE BILA BIBE EM Ê LI BER XWE BIDIN’
Şerzat Mihemed, anî ziman ku ew ê ti carî dev ji berxwedana xwe bernedin û got, “Em îro li vir axa xwe diparêz in. Weke ciwanek a Kobanê, diyar dikim ku çi dibe bila bibe ew ê berxwedana me berdewam bike. Çavê me ne li axa ti kesiye û me êrîşê kesî nekiriye. Ev ax axa me ye. An em ê li ser van axan bi awayekî azad bijîn, an jî heta şehadetê em ê li ber xwe bidin.”
‘KURT TI CARÎ TESLÎMIYETÊ QEBÛL NAKE’
Welatiyê bi navê Dogam jî destnîşan kir ku ti mafê Erdogan di van axan de nîne û wiha got, “Li gorî hemû qanûnên cîhanê hedefgirtina bendavan sûc e. Lê dewleta Tirk her roj bendava me dike hedef. Bi balafirên şer êrîş dike. Ger îro ev bendav hilweşe dê bi dehan cihên niştecihbûnê di bin avê de bin. Ma kes vê nabîne? Dewleta Tirk dibêje ewlekariya gelê Tirk. Ma qey ewlekariya gelê Kurd û gelê Ereb nîne? Her roj komkujî dike, êrîş dike û dagir dike. Ev der axa me ye, bendava me ye, tiştekî Erdogan li vir nîne. Ev ax yên me ne û em ê ti carî dev ji berxwedana xwe bernedin û teslîmiyetê qebûl nekin. Eger parazvanên mafên mirovan ên navneteweyî hebin, divê li dijî tiştên ku îro li vir diqewimin bibin xwedî helwest. Lê belê, bi bêdengiya xwe, ew vê yekê piştrast dikin. Lê divê her kes vê yekê baş bizanibe, Kurd ti carî teslîmiyetê qebûl nakin.”
Edlê Romî, jî anî ziman ku Bendava Tişrînê bi xwîna bi hezaran ciwanên Kurd hatiye rizgarkirin û destnîşan kir ku êrîşên dewleta Tirk a dagirker wê nekaribe vîna ciwan û gelê Kurd bişkîne.
Mihemed Elî Şêx jî got, “Bi heftiyan e li vir berxwedaneke bêhempa tê raberkirin. Dewleta Tirk bi rojane gel bombe dike û komkujî dike. Em ê ti carî rê nedin dewleta Tirk van axan û bendava me dagir bike.”
Ezedîn Şêx, jî da xuyakirin ku dewleta Tirk li ber çavê tevahiya cîhanê li dijî gelê Kurd şerê qirkirinê daye destpêkirin û got, “Erdogan bi awayekî eşkere dibêje em ê hemû destketiyên gelê Kurd tine bikin. Armanca dewleta Tirk tinekirina Kurdan, komkujî kirin û dagirkirina herêmê ye. Ev şer ne tenê li dijî gelê Kurd e, di heman demê de li dijî tevahiya gelê herêmê ye. Ji ber vê yekê îro hemû pêkhatiyên herêma Bakur û Rojhilatê Sûriyeyê li bendava Tişrînê li dijî êrîşên dagirkeriyê li ber xwe didin. Berxwedana me wê bidome. Divê tevahî cîhan vê yekê zanibe, xeyalên Erdogan ên ji bo van axan wê pêk neyê.”
