Girtiyê bi nexweşiya giran Mehmet Emîn Çam ê 73 salî ku li Girtîgeha Girtî ya Tîpa T a Beşîrî ya Êlihê tê ragirtin, 16’ê Nîsana 2025’an cara duyemîn krîza dil derbas kir. Piştî krîz adil rakirin Nexweşxaneya Lêkolîn û Perwerdeyê ya Êlihê û anjiyo lê hate kirin, stent li rehekî wî hate bicihkirin. Lê belê ji ber temenê xwe dest li rehên wî yên girtî nekarî bê kirin. Mehmet Emîn Çam ku li odeya çavdêriya awarte bi rengekî kelepçekirî heta tedawîkirin, 22’ê Nîsanê careke din ew xistin girtîgehê. Rewşa Mehmet Emîn Çam piştî nexweşxaneyê hîn giran bû, bedewa wî werimî û bi tedawiya dawî re Çam neçar ma ku êdî rojane 20 dermanan bixwe.
BIRYAR A DOZGERIYÊ Û SAZIYA TIP A EDLÎ YE
Ji bo Mehmet Emîn Çam ku di lîsteya girtiyên bi nexweşiya giran a Komeleya Mafên Mirovan (ÎHD) de ye, parêzeran bi daxwaza taloqkirina ceza serî li Wezareta Edaletê dan. Wezaretê serlêdan red kir û diyar kir ku divê dozgerî biryarê bide. Mehmet Emîn Çam ku ji ber pirsgirêkên nexweşiyê li nexweşxaneyê derkete pêşberî heyetê, careke din sewqî Saziya Tipa Edlî (ATK) hate kirin ku ATK’ê sala 2024’an ji bo wî gotibû, ‘Dikare li girtîgehê bimîne’. Heyeta nexweşxaneyê îdîa kir ku pirsgirêkên tenduristiyê yên Mehmet Emîn Çam nehatiye tespîtkirin û îdîa kir ku saziya biryarê bide ATK ye. Piştî biryarê tê payin ku Çam careke din sewqî ATK’ê bê kirin. Li gorî kontrolên dawî yên li nexweşxaneyê hate tespîtkirin ku nirxên gurçikê yên Çam gelekî bilind bûye û bandoreke neyînî li tenduristiya dil dike.
Mehmet Emîn Çam beriya niha emeliyatên dil û kataraktê derbas kir û hatibû tespîtkirin ku tumor li ser mejiyê wî heye, her wiha aliyê wî çepê jî felç bûye. Di heman demê de ji gurçikê jî du caran emeliyat bû û guhê wî yê aliyê rastê baş nabihîze. Demên dawî çavên wî jî baş nabîne. Parêzeran nerazîbûn nîşanî biryarê dan û diyar kirin ku divê Çam tavilê bê berdan. Keça Çam Şemal Çam anî ziman ku bavê wê nikare hîn bêhtir li girtîgehê bimîne.
REHÊN WÎ YÊN GIRTÎ HÎN JÎ PIRSGIRÊK IN
Şemal Çam anî ziman ku her cara bavê xwe dibîne bavê wê jê re dibêje ‘Naxwazim di kêliyên xwe yên dawî de li vir bim’ û got, “Piştî ku ji nexweşxaneyê derket û ji nû ve xistin girtîgehê min rewşa wî ya dawî pirsî. Got, piştî emeliyatê bedena wî werimî ye. Anî ziman ku pirsgirêkên piştî krîzê dewam kiriye. Ji xwe bi tena serê xwe nekarî bê hevdîtinê, hevalên wî yên girtî ketibû bin çengên wî û ew anîn. Guhê wî ji berê bêhtir giran bûbû; ji bo gotinên me fêhm bike em neçar dimînin ku du sê caran dubare bikin. Herdu guhên wî jî giran bûne. Dibêje rewşa wî baş e, lê belê ji derve ve welê xuya nake.”
ROJÊ 20 DERMANAN DIXWE
Şemal Çam diyar kir ku bavê wê rojê 20 dermanan dixwe û got, “Ji ber ku rehê wî yê duyemîn venebûye rîsk heye ku krîzê derbas bike. Hejmara dermanên rojane dixwe zêde bû. Di axaftina bi telefonê de dema em jê dipirsin, bê rewşa wî çawa ye, timî dibêje ‘ez çawa bim?’ Rewşa ku tê de ye êdî nayê îdarekirin. Her mehê diçe nexweşxaneyê. Ev pêvajo ji bo wî gelekî zehmet e. Em dixwazin rojek berî rojekê bê berdan. Divê ev êşkence bi dawî bibe. Divê berpirsyar hemû gavê biavêjin. Rehên dil û mejiyên wî xitimî ne. Divê li derve bê dermankirin. Ev rewş dike ku nexweşiyên cuda jî li wî der bibin. Ji bo hîn bêhtir giran nebe divê bê berdan.”
