Desteya Hevbeş a Nivîskar û Rewşenbîrên Kurd li Rojavayê Kurdistanê bi boneya salvegera 41`emîn a wefata nivîskar û helbestvan Cegerxwîn (Şêxmûs Hesen) li mala wî ya li taxa Xerbî ya bajarê Qamişlo merasîmeke bibîranînê li dar xist.
Bi dehan endamên sazî û dezgehên rewşenîrî yên li Kantona Cizîrê, nûnerên ji saziyên Rêveberiya Xweser û şêniyên bajarê Qamişlo di merasîmê de amade bûn.
Merasîm bi deqeyek rêzgirtinê dest pê kir. Piştre endamê Desteya Hevbeş a Nivîskar û Rewşenbîrên Kurd li Rojavayê Kurdistanê Telal El Şêx axivî û got: “Cegerxwîn tevahiya jiyana xwe ji bo gelê xwe yê Kurd terxan kiriye, bi helbestên xwe piştgirî daye, gelek helbest li ser dîroka Kurd nivîsandine. Da ku çanda gelê xwe bi gelên din bide nasîn.”
Piştre keça Cegerxwîn a bi navê Bonya Hesen axivî û got: “Bi navê malbata Cegerxwîn ji Sitockolmê heta Qamişloy silavan dişînim û serkeftinê ji were dixwazim. Ez dixwazim bêjim ku bibîranîna navdaran, em tev dizanin ku erkekî neteweyî ye, her wiha erkekî wêjeyî ye jî û bi salan e miletê cîhanê navdarên xwe bi bîr tîinin.”
Piştî axaftina keça Cegerxwîn, hunermend Beha Şêxo û Ebdilrehman Elo hin stranên bi gotinên Cegerxwîn pêşkêş kirin.
Di berdewama çalakiyê de helbestvan Mûsa Dawud, Şev Hesen û Welîd Ebdulrehman helbestên Cegerxwîn ên bi navê (Şeva Hicran, Jîn û Hebûn) xwendin.
Di dawiyê de beşdarên merasîmê li heman cihê merasîmê ku gora Cegerxwîn jî lê ye, gul danîn ser gorê.
Nivîskar û helbestvan Cegerxwîn sala 1903’yan li gundê Hisarê yê Kercewsê yê Mêrdînê ji dayik bûye, sala 1984`an jiyana ji dest daye. Ji bo helbest, perwerde û têkoşîna ji bo azadî û belavkirina çanda Kurdî jiyana xwe têkoşîn kiriye.
