Şervanê Hêzên Komandos ên QSD’ê Ebas (Mihemed Nûr Terbûş) ku di 23’yê Mijdara 2025’an li Bexdikê şehîd bûbû, îro bi merasîmeke girseyî li Pakrewangeha Şehîd Dîcle ya li bajarê Kobanê hat veşartin.
Di merasîmê de gerîlayên HPG’ê Sadiq Kobanê (Ferhat Balî) ê ku di 14’ê Tebexa 2020`an de li Garê, Azad Gever (Cesûr Ahmed) ê ku 11’ê Tebexa 2020`an li Metîna, Şiyar Kobanê (Ehmed Cuma) ê ku di 29’ê Tebaxa 2019’an li Garê û Mazlum Kobanê (Mahmut Mise) ê ku 1’ê Hezêrana 2019’an li Zapê şehîd bûne hatin bibîranîn.
Bi sedan şêniyên kantona Firatê, endamên saziyên Rêveberiya Xweser, partiyên siyasî, rêxistinên jinan û ên sivîl beşdarî merasîm bûn. Merasîm bi deqeyek rêzgirtin dest pê kir.
Dûre hevseroka Meclisa Partiya Yeketiya Demokratîk (PYD) a Kantona Firatê Bêrîvan Îsmaîl sersaxî ji malbatên şehîdan re xwest û şehîdên azadiyê bi bîr anîn.
Bêrîvan Îsmaîl diyar kir ku ew bi saya berxwedan û têkoşîna şehîdan gihiştin vê asta û wiha got: “Em bi şehîdên xwe serbilind in. Em ê tu carî dest ji xeta wan bernedin. Ji ber ku şopandina rêya şehîdan serkeftina herî pîroze. Dijmin her tim dixwaze me tune bike, lê tu carî wê xewn û xeyalên dijmin pêk neyên. Tişta ku ji me tê xwestin ew e ku dest bidin hev û li hember dijmin têkoşîna xwe xurtir bikin û dijmin têk bikin.”
Hevserokê Desteya Jîngehê ya Kantona Firatê Arif Balî destnîşan kir ku ew ê xewn û xeyalên şehîdên xwe ta asta serkeftinê pêk bînin û ev li gotinên xwe zêde kir: “Şehîdên me hebûn û nasnameya me ne, em ê bi hemû hêza xwe şopdarên rêya şehîdan bin.”
Bavê şehîd Ebas, Farûq Terbûş di merasîmê de anî ziman ku bi şehadeta kurê xwe serbilind e û wiha domand: “Em soz didin ku em ê şopdarên rêya şehîdan bin û em tu carî bi şehadetê xemgîn nabin, berovajî bê yekê wê hêza me xurt dibe.”
Dûre wesîqeya şehîdan hatin xwendin û radestî malbatên wan hatin kirin.
Cenazeyê şehîd Ebas bi tilîlî û dirûşma “Şehîd namirin” hat veşartin.
