Li gorî raporê nêzîkî 1 milyon leşkerên Rûsyayê û 400 hezar jî leşkerên Ûkraynayê yan jiyana xwe ji dest dane yan jî birîndar bûne.
Li gorî texmînên CSIS’ê heya niha nêzîkî 250 hezar leşkerên Rûsyayê û di navbera 60 û 100 hezaran de jî leşkerên Ûkraynayê jiyana xwe ji dest dane.
Ev dane nîşan didin ku ev şer veguheriye yek ji mezintirîn şerê bixwîn ê serdema modern.
Bi taybetî jî ev yek weke mezintirîn windahiya şerî ya piştî serdema Yekîtiya Sovyetan a li Rûsyayê xwe nîşan dide.
Lê belê rastiya statîstîkên bi vî rengî tên nîqaşkirin. Di gel ku Ûkrayna têkildarî windahiyên xwe daneyên fermî bi raya giştî re parve nake, her wiha tê nirxandin ku Rûsya jî windahiyên xwe yên rastîn eşkere nake.
Rapora berbehs ihtîmaleke mezin xwe dispêre texmînên îstixbaratî yên Dewletên Yekbûyî yên Emerîkayê û Îngilistanê.
Amadekarê raporê Seth G. Jones dibêje ku Rûsyayê ji destpêka sala 2024’an ve ye kariye bes kêmtirî ji sedî 1’ê xaka Ûkraynayê bi dest bixe û diyar kir ku ev rewş nîşan dide ku di serdema modern de ev şer gelekî hêdî dimeşe.
Her wiha li gorî lêkolîna hevpar Mediazona ku saziyeke çapemeniyê ya serbixwe ya Rûsyayê ye û Serwîsa BBC’yê ya Rûsyayê di navbera 24’ê Sibata 2022’yan û Gulana 2025’an de li Ûkraynayê 109.625 leşkerên Rûsyayê jiyana xwe ji dest dane.
Lê belê ev lêkolîn bes xwe dispêre çavkaniyên eşkere (îlanên şînê, parvekirinên malbatan û daxuyaniyên rayedaran) û tê diyarkirin ku hejmara rastîn gelekî zêdetir e.
