Jinên bajarê Kobanê, li pêşiya qada jina azad ragihandin ku wan dest bi çalakiyên xwe yên bi boneya 8’ê Adarê Roja Jinan a Cîhanî kirine. Jinên li wir ji ANF’ê re axivîn û diyar kirin ku 8’ê Adarê roja têkbirina desthilatdariyê ye.
‘BI SAYA JINÊ HOVÎTIYA DAÎŞ TÊK ÇÛ’
Koordînasyona Kongra Star a Şêranê Nadiya Hiso diyar kir ku 8’ê Adarê roja têkbirina desthilatdariyê ye û wiha got: “Em li tevahî jinan vê rojê pîroz dikin, ev roj roja şikandina desthilatdariyê ye, roja têkoşînê ye. Roja têkoşîna jina Kurd e, ku li bajarê Kobanê hovîtiya DAÎŞ têk bir. Em jî careke din bi wî ruhî li ber xwe didin. Ji lewra em ê ji niha û pêde zêde li qadan bin û îradeya jina azad temsîl bikin. Ew dixwazin jinê qir bikin û tune bikin. Lê em jî dibêjin, jin jiyan e û dê jiyan jî bi destê jinê bedew bibe. Niha Kobanê ya ku tevahî cîhan ji terora DAÎŞ’ê rizgar kir, di nava dorpêçê de ye. Em ê jî bi xeta azadiya jinê jî li ber xwe bidin. Em ê di nava civakê de rabin ser piyan, bi semîner û meşan li qadan bin. Bi xeta Rêber Apo ya azadiya jinê, em vê rojê pêşwazî bikin.”
‘EM Ê LI SER RIYA SAKÎNE, LEYLA Û BÊRÎTANAN BIN, EW RIYA SERKEFTINÊ YE’
Dayîka bi navê Fatme Helac destnîşan kir ku ew ê doza Sakîne û hevrêyên wê heta dawiyê bişopînin û got: “ Em bi rengê jina Kurd li her çar parçeyên Kurdistanê 8’ê Adarê pêşwazî bikin. Bi keda jinê, em hene û em ê li ber xwe bidin. Em ê Newroza xwe jî bi rengê jinê pêşwazî bikin. Jin serê xwe ji ti kesî re natewînin. Niha di şoreşa Rojava de şexsê jinê kirin hedef. Ji ber ku jinê destkeftiyên dîrokî bi dest xistin. Li her derê, bû şervan, bû dayîk, bû dîplomasî û bû pêşeng jî. Niha em bang li her jineke Kurd dikin ku rabin ser piyan û bi dirûşmeya ‘Berxwedan Jiyan e’ em ê berz bikin. Jin dê weke Leyla Qasim, Sakîne û Bêrîtanan, li ber xwe bidin. Îro roj roja berxwedanê û têkoşînê ye.”
Berdevka Meclîsa Jin a PYD’ê Bedîa Miho anî ziman ku ew ê bi reng û hêza jinê berxwedana xwe berdewam bikin û got: “Çawa ku me DAÎŞ têk bir, niha careke din em li ber xwe didin. Ruxmî ku ew îradeya jin jî napejirînin, lê em ê bi israr li ber xwe bidin. Em ê hebûna xwe misoger bikin. Em ê çalakiyên xwe yên cur bi cur jî pêk bînin. Vê rojê li tevahî jinan pîroz dikim û li Rêberê tevahî jinan jî pîroz dikin. Em ê destkeftiyên şoreşa Rojava ya ku bi destê jinê hatibû destpêkirin û parastin, car din biparêzin.”
