Dadgeha Gelan a Daîmî (Permanent Peoples’ Trîbunal), di 6 û 7’ê Sibata 2025’an de li Brûkselê li hev civiyabû.
Dadgehê di rûniştina 54’emîn de sûcên şer û binpêkirina mafên mirovan ên ji sala 2018’an heta niha li Rojava û herêmên Bakur û Rojhilatê Sûriyeyê hatine kirin, girt dest.
Dadgeh, li ser daxwaza 9 saziyên li Rojava hatibû lidar xistin. Li ser vê bingehê bersûc hatine agahdarkirin, lê bersûc bersiv nedane an jî tevlî rûniştinê nebûne. Di rûniştinên dozê de, berpirsyariyên rayedarên payebilind ên Tirkiyeyê bû mijara darizandinê.
Dadgeha Gelan a Daîmî wê di 26’ê Adarê saet di navbera 14.00-16.00’an de li Parlamenta Ewropayê ya li Brûkselê bi çalakiyek taybet biryara xwe ya dawî eşkere bike.
Nûnerên saziyên civakî yên sivîl û navneteweyî, endamên çapemeniyê û parêzvanên mafên mirovan ji bo şopandina biryarê, hatin vexwendin.
Dadgehê di daxuyaniya xwe ya ewil van tesbîtan kiribû;
“Êrîşa Tirkiyeyê ya li dijî Sûriyeyê bêyî destûra Neteweyên Yekbûyî sûcekî navneteweyî ye. Êrîşên li hemberî sivîlan, koçberkirina bi darê zorê, hedefgirtina binesaziyan, zerara li hawirdorê, hedefgirtina qadên perwerdehiyê, êşkence, destdirêjî, binçavkirin û tinekirina mîrateya çandî, hemû sûcên li dijî mirovahiyê ne. Ev kiryar nîşana sûcên şer û qirkirinê ne ku ji aliyê Tirkiyeyê ve hatine kirin.”
