Li bejahiya Dêrazorê ya li aliyê rojhilat, şaneyên DAÎŞ’ê êrişên li ser bendên kontrolê yên Hêzên Sûriyeya Demokratîk (QSD) zêde kirine. Çeteyên DAÎŞ’ê doh êvarê êriş birin ser nuqteyeke leşkerî ya QSD’ê ya li bajarokê El Bahrayê. Di êrişê de ku bi taktîka lêbide-bireve hate kirin, tiştek bi kesî nehat. Êrişkar di tarîtiyê de ji herêmê reviyan.
Di nava 24 saetên dawî de êrişa sêyemîn a DAÎŞ’ê ye ku li bejahiya Dêrazorê û Hesekê li hemberî hêzên QSD’ê dikin.
Li gorî daneyên SOHR’ê, ji destpêka sala 2025’an û vir ve DAÎŞ’ê bi giştî 230 carî êriş bir ser herêmên Rêveberiya Xweser a Bakur û Rojhilatê Sûriyeyê.
Li Dêrazorê di 198 êrişan de 51 şervanên QSD’ê û 13 sivîl şehîd bûn, 4 çeteyên DAÎŞ’ê hatin kuştin û 71 kes jî birîndar bûn.
Li Hesekê jî di 17 êrişan de 8 endamên Hêzên Ewlekariya Hundirîn û 4 şervanên QSD’ê şehîd bûn, 4 çeteyên DAÎŞ’ê hatin kuştin û 2 kes jî birîndar bûn.
Li Reqayê di 15 êrişan de 2 sivîl û 8 şervan şehîd bûn, 5 çeteyên DAÎŞ’ê hatin kuştin û 17 kes jî birîndar bûn.
