‘Komîsyona Demokrasî, Xwişk-Biratî û Piştevaniya Mîllî’ ku bi armanca çareseriya pirsgirêka Kurd li Meclîsê ava bûye, wê bi malbatên xizmên ku di şer de jiyana xwe ji dest dane, bicive. Dayikên Aştiyê, Dayikên Şemiyê, nûnerên rêxistinên mafên mirovan ên cuda wê beşdarî civîna komîsyonê bibin û nêrînên xwe li ser pêvajoyê bînin ziman.
Bi navê têkoşîna Dayikên Aştiyê Kania Susîn axivî û anî ziman ku dayikan sekneke bi rûmet nîşan dane û ji bo pêvajoya aştiyê têk neçe, divê daxwazên wan hemû li ber çavan bêne girtin. Kania Susîn diyar kir ku herî zêde Dayikên Aştiyê êş kişandine, lewma hîmê herî xurt ê ‘pira aştiyê’ jî Dayikên Aştiyê ne û got, ew ji bo aştiyê bi biryardarî têdikoşin.
Susîn ragihand ku piştî banga ‘Aştî û Civaka Demokratîk’ a Rêber Apo ya 27’ê Sibatê dayik bi hemû hêza xwe hewl didin birînên xwe bipêç in, lê belê ji dewletê gaveke erênî ya di vî warî de nedîtine. Susîn destnîşan kir ku berevajî gavavêtinê zextên civakî û êrîşên li ser qadên gerîla dewam dikin.
Kania Susîn got, “Bi têra xwe xwîn rijiya. Dem ew dem e ku em êdî hevdu neêşînin, dema xwişk-biratiyê ye, dema gerandina govendê ye, dema gotina stranan bi zimanê xwe ye. Dema bicihanîna banga jiyana xwişk-biratiyê ya Abdullah Ocalan e.”
Dayika Aştiyê Susîn bang li dayikan hemûyan kir û anî ziman ku eger dayikên leşker û polîsan ên ewladên xwe di şer de ji dest dane bi Dayikên Aştiyê re tevbigerin wê tevkariyeke mezin li pêvajoyê bibe.
Kania Susîn got, “Di vê pêvajoyê de divê em ne weke aliyên dijber, lê weke dayikên ewladên xwe ji dest dane, bibin yek.”
