Meclîsa Dayikên Aştiyê piştî 12 salan li Amedê di navbera 18-19’ê Cotmehê de bi dirûşma “Dayik pêşengên civaka demokratîk û aştiya mayinde ne” konferansa xwe ya sêyemîn lidar xist. Dayikên Aştiyê yên beşdarî konferansa li Navenda Kongreyê ya ÇandAmedê bûn, armanc û daxwazên xwe yên li ser pêvajoya nû destnîşan kirin. Dayikên Aştiyê yên ji Kurdistanê û Tirkiyeyê beşdarî konferansê bûn li ser pêvajoyê û daxwazên xwe ji ANF’ê re axivîn.
‘DIVÊ DEWLET GAVÊ BIAVÊJE’
Fîdan Karadag diyar kir ku Dayikên Aştiyê xwedî li rêya aştiyê ya Rêber Apo derdikevin û got, “Em bi hêviya aştiyê li hev kom bûn. Ji ber vê yekê jî gelekî bi kelecan in. Bi saya têkoşîna zarokên xwe û rêya ku Rêber Apo nîşanî me da, em êdî li tevahiya cîhanê têne naskirin. Ji bo aştiyê em bi berpirsyariyên xwe radibin. Dewlet jî divê berpirsyariya xwe bi cih bîne.
Em dixwazin ku êdî zarokên me bên gel me. Rêber Apo berpirsyariya xwe bi cih anî. Di nava her şert û mercî de em gavê diavêjin, lê belê dewlet hîn jî bêdeng dimîne. Em li benda vê aştiyê ne. Bila êdî xwişk û biratî hebe, em bi hev re bijîn. Em naxwazin ku êedî ciwanên me bimirin.”
‘DIVÊ DERIYÊN GIRTÎGEHAN BÊNE VEKIRIN’
Asiye Sogut destnîşan kir ku ji bo azadiya Rêber Apo divê dewlet gavê biavêje û got, “40 sal in xwîn dirije; em dixwazin êdî rijandina xwînê bisekine. Êdî ne ji me ne jî ji wan bila xwîn nerije. Yekane daxwaza me ew e ku aştî bê vî warî. Eger têgeheke xwişk û biratiyê hebe, li holê mafên me jî hene. Bila zarokên me li dibistanan bi zimanê xwe yê dayikê perwerdeyê bibînin. Zarokên me bi salan ji bo mafên xwe têkoşiyan. Bila deriyên girtîgehan hemû bêne vekirin û zarokên me azad bibin.”
BANGA JI BO XWEDÎDERKETINA LI AŞTIYÊ
Delal Zengîn bang li dayikan hemûyan kir ku xwedî li pêvajoya aştiyê derkevin û got, “Gelê Kurd berpirsyariya xwe bi cih anî. Lê belê Erdogan hîn jî dibêje ‘Tirkiye ya bê teror’. Weke dayik em vê qebûl nakin. Zarokên me terorîst nînin; zarokên me ji bo gelê xwe têkoşiyan. Mafê me yê herî xwezayî ye ku daxwaza mafên xwe bikin. Doza me dozeke mafdar e. Xwedê ev nasname û ziman da; ji bo parstina vê jî ez neçar im têbikoşim. Zarokên min jî ev kirin.
Her kes li ser koka xwe şîn dibe; gelê Kurd jî li ser zimanê xwe şîn dibe. Kes nikare vê înkar bike. Em bi salan înkar kirin; êdî em ê rê nedin vê înkarê.”
‘RIJANDINA XWÎNÊ DIVÊ BISEKINE’
Ayşe Aybek anî ziman ku weke dayik ji bo sekinandina rijandina xwînê wan bi salan têkoşîn meşandin û got, “Rêber Apo ev pêvajo da destpêkirin, lê belê dewleta Tirk û desthilatdariyê berpirsyariya xwe bi cih neanî. Dilê me dayikan dişewite, em êdî naxwazin kes bimire. Ji vê derê bang li dayikên leşker û polîsan dikim: Werin em bi hev re xwedî li vê aştiyê derkevin, bila zarokên me nemirin. Em bi hev re dest bidin hev, biçin Meclîsê û daxwazên xwe ragihînin. Em tenê aştiyê dixwazin. Ez xwedî li zimanê xwe derdikevim. Ji bo vê têdikoşim.”
