Cejna Newrozê wê îsal bi dirûşma “Newroza Azadî û Yekîtiya Demokratîk” li herî kêm 53 navendan bê pîrozkirin. Li gel pîrozbahiyên li navendên bajar û navçeyan, wê li gundan jî agirê Newrozê bê dadan.
Di çarçoveya pîrozbahiyan de di 21’ê Adarê de wê li Amed û Stenbolê agir bê dadan. Di 23’ê Adarê de jî li Wan û li dehan navendan Newroz bê pîrozkirin. Li Amedê jî agirê destpêkê yê Newrozê wê li sûr ên dîrokî yên Amedê bê dadan.
Ji Komîteya Amadekar a Newrozê ya Amedê Arzû Kahraman anî ziman ku li gelek nuqteyên bajêr wê agirê Newrozê bê dadan û ji bo jinan bernameyeke xweser bê amadekirin.
Arzû Kahraman got, “Em ê bi peyamên yekîtî û aştiyê agir dadin” û banga tevlîbûna xurt li gelan kir.
‘AGIRÊ DESTPÊKÊ WÊ LI SÛR ÊN AMEDÊ BÊ DADAN’
Têkildarî bernameya Newrozê Arzû Kahraman daxuyanî da û anî ziman ku di 11’ê Adarê de wê pîrozbahî li Sûr ên Amedê destpê bike û di 21’ê Adarê de jî Parka Newrozê bi fînaleke mezin temam bibe.
Arzû Kahraman bal kişand ser wateya mezin a Sûr ên Amedê ji bo gelê Kurd û got, “Em ê li wan sûran destpê bikin ku Zekiye Alkan bi agirê Newrozê bedena xwe da ber agir.”
‘WÊ BI KINCÊN XWE YÊN RENGÎN LI QADÊ BIN’
Arzû Kahraman diyar kir ku pîrozbahî wê ne tenê li navendekê be, li navçe, gund û qadên bejahî yên Amedê jî wê Newroz bê pîrozkirin û got, “Newroz ji bo me berxwedana li dijî zilmê ye, nîşaneya têkoşînê ye. Di heman demê de nîşaneya kevneşopî û dîroka gelekî ye. Lewma ji bo gelê Kurd xwedî wateyeke gelekî mezin e. Em jî weke gelê Amedê di 21’ê Adarê de em ê biherikin Parka Newrozê. Gelê me wê bi kincê xwe yê rengîn û kevneşop Newrozê pêşwazî bike. Di serî de jin û ciwan em li benda her kesî ne ku beşdarî pîrozbahiya Newrozê bibin. Newroz roja nîşaneya daxwaza azadî û têkoşîna gelan e.”
Arzû Kahraman bi bîr xist ku ew Newroz a îsal bi dirûşma “Aştî û demokrasiyê” pêşwazî dikin û anî ziman ku di pêvajoyekê de ku nîqaşên li ser civaka demokratîk û entegrasyona demokratîk têne kirin, pîrozbahî hîn bêhtir girîng e.
‘ROJEVA ESASÎ WÊ YEKÎTIYA GELAN BE’
Arzû Kahraman herî dawî got, “Di vê Newrozê de peyama me wê bi vî rengî be: Bi êrişên li ser Rojava re di nava gelê Kurd de vejîn û yekîtî pêk hat. Li gorî me di vê Newrozê de divê gelên Rojhilata Navîn yekîtî û hevgirtina xwe nîşan bidin. Em ê di vê Newrozê de yekîtiya gelan biqîrin û vê nîşan bidin. Ji ber ku îro pêwîstiya hemû gelan bi yekîtiyê heye. Em ê jî bi vê feraset û yekîtiyê Newroza xwe pîroz bikin.”
