Di dîroka gelê Kurd de gelek destanên lehengiyê hene ku ti carî nayên jibîrkirin. Şehîd Bêrîtan (Gulnaz Karataş) a ku li dijî xiyanetkaran rabû û bû sembola berxwedan û sekna jinên azad, cewherê jinên Kurd temsîl kir.
Yek ji fermandarên YJA Starê Hesret Dilgeş Amed têkildarî çalakî û berxwedana şehîd Bêrîtan axivî. Hesret Dilgeş Amed di destpêka axaftina xwe de şehîd Bêrîtan û şehîdên meha Cotmehê bi bîr anî û got, “Heval Bêrîtan di salên 1990’î de dema ku gelê Kurd li hemû Kurdistanê rabû serhildanê, tevlî nava refên azadiyê bû. Hevrê Bêrîtan bi zanista ku ji Rêber Apo fêr bûye û bi keda xwe, jiyana xwe rêxistin kir. Heval Bêrîtan bi sekna xwe, rêxistinbûna xwe û îradeya xwe ya azad li dijî tasfiyegerên demê rabû. Bi vî rengî xwedî li xeta Rêber Apo derket. Şehîd Bêrîtan fikra Rêber Apo di jiyana xwe de xiste meriyetê.
Heval Bêrîtan bi çalakiya xwe bû sembola lehengiyê ya jinên Kurd ên ku ti carî teslîm nabin. Ala ku şehîd Bêrîtan dewr girtî, hebûna gelê Kurd îspat kir. Ji vir û şûnde jî di bin vê alê de em ê ji bo azadiya fîzîkî ya Rêber Apo têbikoşin. Em şopdarên heval Bêrîtan in.”
Hesret Dilgeş Amed destnîşan kir ku sekna şehîd Bêrîtan ne tenê di qada leşkerî de, di qada îdeolojîk de jî wateyeke pir mezin hilgirt û got, şehîd Bêrîtan ti carî li ber tasfiyegeran serî netewand.
Gerîlaya YJA Starê Agir Zîlan jî ev tişt got, “Tişta ku me herî zêde kêfxweş dike, ev gotina ku heval Bêrîtan di rapora xwe de ji bo Rêber Apo gotiye: ‘Ez dixwazim romana Rêbertî binivîsim’. Ev gotin me teşwîq dike ku xwe pêş bixin û di heman demê de dilsoziya me ya bi Rêber Apo re xurt dike. Heval Bêrîtan ji bo me rê û xetek e. Ew çavkaniya serbilindiyê ye. Em li ber sekin û têkoşîna heval Bêrîtan bi rêzdarî bejna xwe ditewînin.”
