Meşa Mezin a Azadiyê ku ji bo balê bikişîne ser polîtîkaya tecrîdê ya li ser Rêberê Gelê Kurd Abdullah Ocalan û misogerkirina azadiya fîzîkî ya Ocalan di 1’ê Sibatê de li Wan û Qersê destpê kir, dewam dike. Baskên Qers û Wanê yên Meşa Mezin a Azadiyê wê di 13’ê Sibatê de bigihêjin Amedê.
Dayikên di Nobeda Edaletê de ne ji ANF’ê re axivîn, ji bo şikandina tecrîdê işaret bi girîngiya têkoşînê kirin û ji bo xwedîderketina li Meşa Azadiyê bang kirin.
ARMANC JI MEŞÊ EDALET, WEKHEVÎ Û MIROVAHÎ YE
Meryem Soylû anî ziman ku çalakiyên li dijî tecrîdê hatine destpêkirin girîng in, divê her kes piştgiriyê bidin û got, “Ez ji vê derê têkoşîna li girtîgehan silav dikim. Em li vê derê di Nobeda Edaletê de ne. Di nobedê de jî yekane tişta ku em dibêjin aştî û edalet e. Sîstem divê daxwazên dayikan bi cih bîne. Êdî ji niha û pê ve nikare îradeya gelê Kurd bişikîne. Dijmin çi dike bila bike wê nikaribe îradeya gelê Kurd bişikîne. Sîstem êdî neçar e ku bi gelê Kurd re li dora maseyê rûnê. Ez hevalên me yên ji bo edaletê dest bi meşê kirine û têdikoşin silav dikim. Meşa wan gelekî girîng e û berxwedaneke mafdar e. Armanc ji meşê edalet, wekhevî û mirovahî ye.”
HETA KU GIRTÎ HEMÛ BÊNE BERDAN EM Ê TÊBIKOŞIN
Meryem Soylû ji bo Meşa Azadiyê banga tevlîbûnê kir ku 13’ê Sibatê wê bigihêje Amedê û got, “Divê em hevalên xwe yên dest bi meşê kirine bi tenê nehêlin. Ji vê derê bang li gelê Amedê dikim; 13’ê Sibatê her kesên ku ji xwe re dibêje ‘Ez Kurd im’ divê dest ji karê xwe berde û piştgiriyê bide Meşa Mezin a Azadiyê. Wê rojê divê bi hezaran kes li hev kom bibin û piştgiriyê bidin têkoşîn û meşê. Ji ber ku ev meş meşa azadî, edalet û yekîtiyê ye. Ev meş ne tenê ji bo Kurdan e, di heman demê de ji bo gelên Tirkiyeyê ye. Em qala tecrîdê dikin; tecrîd ne tenê li zindanê ye her wiha bandor li tevahiya gelê Kurd kiriye. Werin em ji bo edalet û aştiyê di 13’ê Sibatê de li qadan bin, bi hev re bimeşin. Em êdî mirinê û barîna rondikên çavan naxwazin. Her kes baş zane ku mifteya wekhevî û azadiyê li Îmraliyê ye. Her tişt bi Rêberê Gelê Kurd Abdullah ocalan destpê dike, bi wî diqede. Divê gelê me bi vî rengî li têkoşînê binihêre. Heta ku Rêberê Gelê Kurd û girtî hemû bêne berdan em ê têkoşîna xwe dewam bikin.”
EM DAXWAZA AZADIYA BIRÊZ ABDULLAH OCLAAN DIKIN
Endama Rêveberiya Bajarê Amedê ya DBP’ê Muşeher Ulker ku tevî dayikan di Nobeda Edaletê de ye, bal kişand ser girîngiya Meşa Azadiyê ya ku 1’ê Sibatê destpê kir û got, “Em dayik ji bo edaletê bi rojan e li vê derê di nobedê de ne. Em daxwaza azadiya Birêz Abdullah Ocalan dikin. Ev çalakiyên me yên ji bo şikandina tecrîdê destpê kirin îro mezin bûne. Meşa Mezin a Azadiyê ji du baskan destpê kir. Meşa Azadiyê di 13’ê Sibatê de wê bigihêje Amedê. Meş heta warê Birêz Ocalan wê dewam bike. Sed sal in zilm û zexteke giran li gelê Kurd tê kirin. Em ew Kurdên berê nînin. Meşa ku hatiye destpêkirin meşa aştiyê ye. Bi salan e em nikarin agahiyê ji Rêberê xwe werbigirin. Armanc ji meşê şikandina tecrîdê ye. Her kesên ku daxwaza aştî, edalet û wekheviyê dikin divê tevlî vê meş û têkoşînê bibe. Weke dayik, yekane daxwaza me aştî ye. Bila êdî her kes rabe ser piyan, têbikoşin û piştgiriyê bidin hev.”
