Çalakiya nobetê ya ku li sînora Nisêbîn-Qamişloyê ji ber êrîşên artêşa Tirk û koalîsyona çeteyan SMO’yê ya li hemberî Bakur-Rojhilatê Sûriyeyê didome. Dayikên ku tevlî çalakiya nobetê bûn ji ANF’ê re axivîn.
‘JI BO ROJAVA EM LI VIR IN’
Dayika bi navê Saîdê Yardim wiha axivî: “Ez ji Êlihê ji bo aştî û yekitî hatim. Em naxwazin tu kes bimire. Em dayikên ku dilê wan dişewitin in. Ji bo Rojava li vir in. Şer naxwazin, yekane armanca me aştî ye. Rojava xeta me ya sor e. Navnîşana çareseriyê Rêber Apo ye. Em dixwazin deriyê aştiyê vebe.“
‘DIVÊ ÊRÎŞ BI DAWÎ BIBIN’
Dayika bi navê Maşallah Kaya jî wiha axivî: “Em hêvî dikin ku hevdîtinên bi Rêbertî re tên kirin aştiyê bîne. Kurd û Tirk dikarin di nav aştiyê de bijîn. Êdî em naxwazin mirin çêbibe û şer bidome. Em dixwazin êrîşên li hemberî Rojava demildest bidawî bibin. Ji bo aştiyê bila bi Rêbertiya me re rûnin.”
‘BAWERIYA ME BI DIJMIN NÎNE’
Dayika bi navê Fatma Kaplan jî wiha axivî: “Êdî pêwîstiya me bi dijmin nîne. Heger aştî dixwazin bila bi Rêber Apo re aştî çêkin. Bila deriyê Rêbertiya me vebe. Rêbertiya me dadwerî û aştiyê dixwaze. Ew jî destê xwe dirêjî me dikin, lê di piştê de jî me dikûjin.”
