Hevserokê DEM Partiyê yê Şirnexê Abdullah Gungen diyar kir ku dewleta ku li Kurdistanê bi feraseta talanê nêzî her tiştî dibe, çavkaniyên bin erdê yên Şirnexê bi dest xistiye û tenê xwîn û rondik herikandiye û wiha got: “Dewleta ku dixwaze nasname, ziman û çanda gel tune bike, çavkaniyên gel ji xwe re distîne.”
Şirnex ji ber çavkaniyên xwe yên bin erdê di bin destê dewletê de ye. Bi taybetî piştî ku hat ragihandin ku li herêmê petrol hatiye dîtin, hema bêje ji cîhanê re hat girtin. Li bajarê ku di salên dawî de leşker û polîs lê zêde bûn, di hilbijartinên xwecihî yên dawî de şaredarî careke din bi dengên veguheztî hate desteserkirin. Şêniyên bajarê ku hêzên dewletê lê kom bûne, piştî berxwedana rêveberiya xweser neçar man koç bikin. Dema piraniya xelkê li Şirnexê man, hilbijartin bi dengê leşker, polîs û memûran hatin xespkirin.
8 HEZAR Û 241 LEŞKER Û POLÎS
Hevserokê DEM Partiyê yê Şirnexê Abdullah Gungen ji ANF’ê re axivî û got, “Di hilbijartinên giştî yên sala 2023’yan de partiya me bi ferqeke mezin a dengan (zêdeyî 18 hezar deng, AKP’ê derdora 10 hezar deng standiye) serkeftî bû. Divê rewşa guhertina hilbijartinên xwecihî bi baldarî were xwendin. Bi qeydkirina polîsan armanca wan a sereke ew e ku ji xwe re pergehek qanûnî çêbikin.”
JI GELÊ ŞIRNEXÊ VEDIŞÊRIN
Gungen diyar kir ku mejiyê dewletê ku di salên 1990’î de hewl da gundan bi şewitandinê vala bike, niha bi hinceta herêmên ewlekariya taybet talan dike û wiha got: “Dewleta ku li herêmên wekî Cûdî, Gabarê ketina welatiyan qedexe dike. Bi dehan kanên komirê yên qaçax ên bi hinceta derxistina petrolê herêma Gabarê talan dikin. Bi deh hezaran dar ji aliyê cerdevan û leşkeran ve hatin birîn û hatin firotin. Li gorî daneyên fermî, heta dawiya salê 30 hezar bermîlên petrolê li Gabarê tê hilberîn.”
BÎR Û ÇAVKANIYÊN ŞIRNEXÊ
Serokê Baroya Şirnexê Rojhat Dîlsîz jî diyar kir ku ev du dem in AKP bi dengên veguheztî li Şirnexê bi ser dikeve û wiha got: “Sedema ku ev qas zext li Şirnexê tê kirin ev e ku Şirnex di warê hafizeya civakî de, di cihekî girîng de ye; para wê ya ji dahata neft û kanzayê. Lê belê ev bû sedema bingehîn a gotina Erdogan ku gotibû ‘Me Stenbol winda kir lê Şirnex qezenc kir’. Şirnex ji bo wan dibe navendeke girîng.”
