KANTONA KOBANÊ
Dewleta Tirk a dagirker li navenda bajarê Kobanê bi 7 balafirên bê mirov ên bombebarkirî êrîş kir. Di êrîşan de 3 endamên Hêzên Ewlekariya Hundirîn birîndar bûn.
Dewleta Tirk a dagirker êrîş bir ser avahiyên xizmetê yên li herêmê. Ji ber êrîşa li ser santrala elektrîkê ya li Kobanê bajar bê elektrîk ma.
Piştre jî bi çekên giran, bi obusan bombe li gundên El Seyada, Ewn El Dadat, El Toxar û El Diricê yên Minbicê barand.
Çavkaniyên Hêzên Sûriyeya Demokratîk (QSD) jî ragihand ku dewleta Tirk a dagirker gundên li rojavayê Girê Spî Gazî Elî, Bîr Kanno, Serûce, Hasadat û Naît, li rojhilatê Eyn Îsayê gundê Ummal-Berameel_El-Muxhelat bi çekên giran bombe kiriye.
KANTONA EFRÎN Û ŞEHBAYÊ
Dewleta Tirk ku li Til Rifetê 1 jê zarok 4 kes qetil kir û 10 kes birîndar kir, bombe li navenda bajêr barand. Di heman demê de balafirên şer û keşfê li ser Kantona Efrîn-Şehbayê geriyan.
Artêşa Tirk a dagirker ku êrîşên dagirkeriyê belav dike gundên Birciqasê, Kilotê, Meyasê, Zirneîtî, Soxanekê, Qinêtrê, Aqîbê, Bênê yên Şêrawayê, gundên Tinib, Merenazê, Malikiyê Elqamiyê, Şêwarqa yên Şerayê, navçeya Til Rifetê, gundên Eyndeqnê, Miniq, Belûniyê, Şêx Îsa, Hirbili Simuqa, Til Medîq, Til Cîcan, Nêyrebiyê, Radarê, Şealê, Xirbêt Şealê yên Kantona Şehbayê bi çekên giran bombe kir.
KANTONA QAMIŞLOYÊ
Li aliyê din, bi balafirên bêmirov ên bombebarkirî êrîş li gundê Mêrga Mîra yê Dêrikê hate kirin. Hate ragihandin ku mala êrîş lê hate kirin vala bû, lewma tiştek bi kesî nehat.
Gundên Tepkê û Girê Wira yên Dêrikê jî bû hedefa dewleta Tirk a dagirker.
Gundê Um El-Kêf ê navçeya Til Temirê jî bi obusan hate bombekirin.
Dewleta Tirk a dagirker taxên Enteriyê û Hilko yên Qamişloyê bombe li navendên asayîşê û Navenda Tenduristiyê ya Xelîcê barand. Di encama êrîşa bi balafirên bêmirov ên bombebarkirî de 3 kes şehîd bûn, gelek kes jî birîndar bûn.
Dewleta Tirk bi balafirên bê mirov ên bombebarkirî êrîş bir ser depoyeke genim a li taxa Enteriyê. Li gorî agahiyan, di encama êrîşê de zerara madî bû.
Dewleta Tirk ku êrîşê dibe ser binesazî û qadên sivîl, li bajarê Amûdê bombe li stasyoneke elektrîkê û derdora wê barand. Agahiyên berfireh ên êrîşê nehate hînbûn.
Yek ji qadên xizmetê yên Dêrikê ku êrîş lê hate kirin, Stasyona Benzînê ya Tiflê ya li gundê Siwêdiyê yê herêma Koçeratê bû. Stasyon 3 caran bi balafirên bê mirov ên bombebarkirî hate bombekirin û gelek karker birîndar bûn. Dewleta Tirk a dagirker piştre careke din bombe li vê deverê barand. Ji ber liv û tevgera balafirên bê mirov ên bombebarkirî ambûlans û gel nekarî biçe cihê bûyerê.
Li Dêrikê stasyoneke gazê jî hate bombekirin. Li gundê Banê Şikeftê yê bajêr jî stasyoneke gazê zerar dît.
Li gorî dema herêmî ber bi saet 03:00 jî taxa Qenatsiwês a Qamişloyê hate bombekirin.
Balafirên şer ên dewleta Tirk a dagirker gundê Seîde yê li bakurê bajarê Tirbespiyê yê Kantona Cizîrê bombe li Stasyona Petrolê ya Ûda barand. Li ser encama êrîşê agahî bi dest neket. Stasyona navborî dawiya sala 2023’an û destpêka sala 2024’an ji aliyê dewleta Tirk a dagirker ve hatibû bombekirin.
