Navenda Ragihandin û Çapemeniya Hêzên Sûriya Demokratîk (QSD) derbarê êrîşên balafirên şer û bêmirov ên dewleta Tirk a dagirker li dijî herêmên başûrê bajarê Şedadê ya Kantona Cizîrê ya Herêma Bakur û Rojhilatê Sûriyeyê de daxuyaniyek da.
QSD’ê diyar kir ku îro, saet 3’yan piştî danê nîvro, dewleta Tirk a dagirker bi balafirên bêmirov û şer, gelek herêmên li beyara Riwêşid a li herêma Şedadê ya başûrê Hesekê bombebaran kirin.
QSD’ê anî ziman ku balafirên dewleta Tirk a dagirker nuqteyên hêzên QSD’ê, malên karkerên sivîl bombebaran kirin, her wiha li ser rêya Xurafî ya di navbera Dêrazor û Hesekê de wesayîta sivîl a ku şivanên pez tê de bû hedef girt. QSD’ê da zanîn ku dewleta Tirk a dagirker 16 caran êrîşên hewayî li dijî herêmê pêk anîn.
Li gorî daxuyaniya QSD’ê 4 şervanên QSD’ê, 6 karkerên sivîl 2 şivan şehîd bûne.
