DFG û MKG’ê di daxuyaniya xwe ya hevpar de diyar kirin ku bûyerên ku li Rojava diqewime ne pevçûnek herêmî ye, berovajî krîzek mirovî ya giran e.
DFG û MKG’ê destnîşan kirin ku HTŞ’ê, komên ku ji hêla Tirkiyeyê ve têne destekirin û hêmanên bi DAÎŞ’ê ve girêdayî êrîşan li ser deverên Kurdan dikin û hat gotin, “Di encama van êrîşan de sivîl hatin înfazkirin, koçberî, êşkence û talan çêbûn.”
DFG û MKG’ê dan zanîn ku li bajarên Kurdan elektrîk û av hatine qutkirin û hate gotin ku hedefgirtina girtîgehên ku girtiyên DAÎŞ’ê tê de ne, gefek mezin li ser ewlehiya tevahiya herêmê û cîhanê çêkiriye. DFG û MKG’ê, destnîşan kirin ku ev bûyer sûcên şer û sûcên li dijî mirovahiyê ne.
Di daxuyaniyê de hate destnîşankirin ku dezenformasyon bi taybetî di medyaya Tirk de, ji bo veşartina komkujî û binpêkirinên mafên mirovan têne kirin.
DFG û MKG’ê dan xuyakirin ku rojnamevan li qadê di bin xetereyek cidî ya ewlehiyê de xebatên xwe didomînin û ji çapemeniya navneteweyî hate xwestin ku bi awayekî serbixwe û zelal li ser pêşketinên li Rojava weşanê bikin.
DFG û MKG’ê diyar kirin ku ev bang ji bo parastina jiyanê, serweriya hiqûqê û rûmeta mirovan tê kirin.
