Desteya Jinan a Rêveberiya Xweseriya Demokratîk a Kantona Tebqayê bi boneya 20’ê Mijdarê Roja Zarokan a Cîhanê şahiyek li dar xist. Şahî li navenda Çand û Hunerê ya Şehîd Musena Ebdulkerîm bi beşdariya 27 zarokan, dayikên wan û nûnerên Rêveberiya Xweser pêk hat.
Piştî deqeya rêzgirtinê Seroka Desteya Jinan a Kantona Tebqayê Tirkiya El Hemade axivî û got, ew hewl didin hewayeke guncaw ji zarokan re peyda bikin û mafên wan ên fêrkirin û lênerînê mîsoger bikin. Tirkiya da zanîn ku di salên dawîn de gavên girîng ber bi başkirina rewşa zarokan ve li herêmê hatin avêtin.
Rêvebera Nivîsgeha Jinan a Rêveberiya Xweseriya Demokratîk a Kantona Tebqayê Necla Ecem jî got, parastina zarokan ne tenê berpirsyariya saziyên girêdayî zarokan e, lê di heman demê be berpiryariya herî kesî ye. Necla bang li herî kesî kir ku hawirdoreke guncaw ji bo zarokan biafirînin, rêz bidin mafên wan û derfetê bidin wan da ku xeyalên xwe bi cih bînin. Necla got, zarok hêviya siberojê ne.
Necla destnîşan kir ku nivîsgeh bi domdarî hewl dide mafên zarokan mîsoger bike û wan ji tundî û paşguhkirinê biparêzin.
Piştî axaftinan, koma zarokan a girêdayî Navenda Çand û Hunerêy a Tebqayê goveneke kurdî bi navê “Gulên Efrînê” pêşkêş kir. Koma Zarokan a Alem El Tifula (Cîhana Zarokan) jî şanoyek li ser bandora medya dîjîtal li ser zarokan pêşkêş kir û govend jî pêşkêş kir.
Di dawiyê de nûnerên Yekitiya Mamosteyan, Desteya Rêveber û Desteya Jinan diyarî pêşkêşî zarokan kirin.
AMÛDÊ
Bi boneya Roja Zarokan a Cîhanê (20’ê Mijdarê) Rêveberiya Dibistanan a bajarê Amûdê yê kantona Cizîrê 2 şahî ji zarokan re li baxçeyên zarokan ên Newroz û Sosin li dar xistin.
Di şahiyan de zarokên her du baxçeyan, mamosteyên wan û Rêveberiya Dibistanan amade bûn.
Di şahiyan de zarokan govend gerandin û pankartên “Ji mafê min e ez hîn bibim” û “Mafên min ên hînbûn, parastin, tenduristî û lîstinê hene” hildan.
