Hat diyarkirin ku li Sûriyeyê piştî hilweşîna rejîma Baasê, wê hilbijartinên parlamentoyê ya cara ewilî di meha Îlonê de bên kirin. Hejmara giştî ya kursiyên li parlamentoyê, ji 150’an derxistin 210’an. 70 ji van kursiyan wê ji aliyê serokê demkî Ehmet El Şera ve bê diyarkirin. 140 kursiyên mayî jî dê bi dengên gel bê hilbijartin. Di çarçoveya sererastkirina nû de, rêjeya temsîlê ya wîlayetan wê li gorî hejmara nifûsê ya sala 2011’an jinûve were sererastkirin.
Serokê Komîsyona Bilind a Hilbijartina Meclîsa Gel a Hikûmeta Demkî Muhammed Teha El Ahmed daxuyanî da SANA’yê û ragihand ku hilbijartin wê di navbera 15 û 20’ê Îlonê de bên kirin.
Teha Ahmed anî ziman ku piştî biryarnameya sîstema hilbijartina demkî, komîteyên jêr wê di nava hefteyekê de bên diyarkirin û ev komite jî wê di 15 rojan de desteya hilbijartinê ava bikin.
El Ahmed diyar kir ku ji bo jin di saziyên hilbijartinê de herî kêm ji sedî 20 bên temsîlkirin, xebat tên meşandin. Her wiha anî ziman ku hilbijartin wê ji aliyê çavdêrên navneteweyî ve were şopandin, wê ji bo lîsteyên namzetan û encamên wê mafê îtîrazê were naskirin.
